काठमाडौं- भारतको एउटा विश्वविद्यालयले चिनियाँ रोबोट कुकुरलाई आफैँले बनाएको दाबी गरेपछि चौतर्फी आलोचना शुरु भएको छ ।

भारतको ग्रेटर नोयडामा रहेको गलगोटिया विश्वविद्यालयले चीनमा निर्मित युनिट्री रोबोटिक्सले विकास गरेको युनिट्री गो२ नामक रोबोट कुकुर आफैँले विकास गरेको दाबी गरेको हो ।

भारतको राजधानी नयाँ दिल्लीमा आयोजना भइरहेको एआई सम्मेलनमा उक्त रोबोट कुकुर राखिएको थियो । सम्मेलनमा गलगोटिया विश्वविद्यालयले उक्त रोबोट कुकुरलाई ‘ओरायन’ नाम दिएको जनाइएको छ ।

विश्वविद्यालयकी सञ्चार प्राध्यापक नेहा सिंहले राज्यसञ्चालित टेलिभिजन डीडी न्यूजसँगको कुराकानीमा ‘ओरायन’ लाई गलगोटिया विश्वविद्यालयको ‘सेन्टर अफ एक्सिलेन्स’ मा विकास गरिएको दाबी गरेकी थिइन् ।

यद्यपि युनिट्रीको उक्त रोबोट कुकुर २ हजार ८ सय अमेरिकी डलरमा बजारमा सहजै पाइने अन्तर्राष्ट्रिय सञ्चार माध्यमले जनाएका छन् ।

घटना सार्वजनिक भएपछि सम्मेलनस्थलबाट उक्त विश्वविद्यालयको स्टल हटाइएको छ । पछि विश्वविद्यालयले उक्त रोबोट कुकुर आफूले विकास नगरेको प्रष्ट्याएको छ ।