काठमाडौं- नेपाली कम्युनिस्ट पार्टीका नेता वामदेव गौतमले बर्दिया क्षेत्र नम्बर १ बाट चुनाव नलड्ने घोषणा गरेका छन्।

थारू समुदायको बाक्लो बसोबास रहेको बर्दियाका दुवै क्षेत्रमा पहाडी मूलका नेतालाई उठाएको गुनासो गर्दै उनले टिकट नेकपा संयोजक पुष्पकमल दाहाललाई फिर्ता गरिदिएका हुन् ।

थारू सामुदायको बाक्लो उपस्थिति रहेको बर्दियामा जातीय सन्तुलन मिलाउन चुकेको भन्दै गौतमले नेकपा संयोजक प्रचण्डलाई टिकट फिर्ता गरिदिएको बताएका छन् ।

बर्दियामा जुनसुकै काममा सफल हुन थारू र गैरथारू समुदायबीच सन्तलुन चाहिने उनले बताएका छन् ।
‘बर्दियाको जातीय अवस्थाबारे तपाईंला थाहा छ । जेन-जी आन्दोलनपछिको अवस्थालाई पनि बेवास्ता गरेर नेपाली कम्युनिस्ट पार्टीले दुवै निर्बाचन क्षेत्रमा पहाडी मूलकालाई उम्मेदवार बनाउने निर्णय सही छैन’, उनले भनेका छन्, ‘त्यसकारण म वामदेव गौतमले यस्तो अवस्थामा बर्दिया १ बाट उमेदवारी नदिने निर्णय गरेँ। तपाईंहरूले दिनु भएको उम्मेदवारको पत्र फर्काइदिएँ ।’

उनले टिकट फर्काए पनि नेकपाको सबै जिम्मेवारीमा आफू खटिरहने बताएका छन् ।

यसअघि आइतबार प्रतिनिधिसभाको चुनावमा उठ्न वामदेवसहित राष्ट्रियसभाका तीनना सदस्यहरूले राजीनामा दिएका थिए ।

प्रतिनिधिसभाको टिकट पाएपछि नेकपा नेताहरू नारायणकाजी श्रेष्ठ र वामदेव गौतमले राष्ट्रिय सभा सदस्यबाट राजीनामा दिएका थिए ।