हङकङ – हङकङेली नेपाली साहित्यकार नरजित राईको सातौँ साहित्यिक कृति ‘विभक्त आकाश’ लोकार्पण गरिएको छ। यो संस्मरण संग्रह ‘किरात सांस्कृतिक मेला’मा आयोजित भव्य समारोहमा सार्वजनिक गरिएको हो।

समारोहमा किरात राई यायोक्खाका अध्यक्ष गजेन्द्र राईको अध्यक्षता रहेको थियो भने नेपाली आदिवासी जनजाति महासङ्घका महासचिव रविन लिङ्गदेन प्रमुख अतिथिका रूपमा उपस्थित थिए। हङकङ साहित्यिक साझा शृङ्खलाका सल्लाहकार रमण गुरुङले विशेष अतिथि र प्रमुख वक्ताका रूपमा कार्यक्रमलाई समृद्ध बनाएका थिए।

कार्यक्रमको अवसरमा लेखक राईलाई नयाँ कृतिका लागि किरायाले ताम्रापत्रसहित सम्मान गरेको थियो। लेखक राईले आफ्नो पुस्तकको कभर आर्टिस्ट रमन गुरुङलाई पनि सम्मान गरेका छन्।

‘विभक्त आकाश’ २२१ पेजको पुस्तकमा साढे दुई दर्जन संस्मरण समावेश छन्। यसअघि राईले ‘आकाश खोज्दै जाँदा’, ‘समुद्रमाथिको सहर’, ‘मनोबिम्ब’, ‘नसकिने बाटो’, ‘मनका नदीहरू’ र ‘किरात राई यायोक्खा हङकङ : विगतदेखि वर्तमानसम्म’ जस्ता कृतिहरू प्रकाशित गरिसकेका छन्।