काठमाडौँ – बलिउड अभिनेता टाइगर श्राफको कारमाथि गोली प्रहार गरेको घटनामा संलग्न रहेको आरोपमा भारतको राजस्थानबाट तीन जना पक्राउ परेका छन्। भारतीय प्रहरीका अनुसार मुम्बईमा गोली प्रहार गरेपछि फरार उनीहरू दिल्ली हुँदै नेपाल भाग्ने तयारीमा थिए।

राजस्थानको कोटा सिटी प्रहरीले सोमबार बिहान करिब साढे ११ बजे कोटा रेलवे स्टेसनबाट तीनै जनालाई पक्राउ गरेको हो। कोटा प्रहरी अधीक्षक तेजस्विनी गौतमले पक्राउको पुष्टि गर्दै उनीहरूमाथि सोधपुछ भइरहेको जानकारी दिएकी छन्।

प्रहरीका अनुसार पक्राउ परेका तीन जना दिल्ली हुँदै नेपाल प्रवेश गर्ने योजनामा थिए। यद्यपि, उनीहरूबाट घटनामा प्रयोग भएको हतियार बरामद हुन सकेको छैन। गोली प्रहारमा उनीहरूको संलग्नता, घटनाको उद्देश्य र अन्य व्यक्तिको भूमिकाबारे प्रहरीले अनुसन्धान गरिरहेको छ।

आइतबार साँझ मुम्बईको जुहू क्षेत्रमा टाइगर श्राफको कारमाथि अज्ञात व्यक्तिहरूले गोली प्रहार गरेका थिए। घटनामा अभिनेता श्राफ सुरक्षित रहे पनि उनका चालक फिरदौससहित दुई जना घाइते भएको विवरण सार्वजनिक भएको छ। चालकको बायाँ हातमा गोली लागेको बताइएको छ।

घटनापछि मुम्बई प्रहरीले आक्रमणकारीको खोजी तीव्र बनाएको थियो। सोही क्रममा राजस्थानको कोटा रेलवे स्टेसनबाट तीन जना पक्राउ परेका हुन्।

यद्यपि, पक्राउ परेका तीनै जना गोली प्रहारमा प्रत्यक्ष संलग्न रहेको पुष्टि हुन बाँकी छ। प्रहरीले उनीहरूको पहिचान, घटनामा प्रयोग भएको हतियार र आक्रमणको पछाडिको कारणबारे थप विवरण सार्वजनिक गरेको छैन। अनुसन्धान पूरा भएपछि घटनाबारे थप तथ्य खुल्ने अपेक्षा गरिएको छ।