काठमाडौं – मन्त्रिपरिषद्का पूर्वअध्यक्ष तथा पूर्वप्रधानन्यायाधीश खिलराज रेग्मीले संविधान र कानुनी शासन नै देशको सबैभन्दा भरपर्दो जग भएको बताएका छन् ।

बडादसैँ २०८३ का अवसरमा शुभकामना सन्देश जारी गर्दै उनले जनताको मतबाट निर्मित संविधान र कानुनको शासनलाई कमजोर पार्न नहुनेमा जोड दिएका हुन् ।

संविधानमा सुधारको आवश्यकता देखिए संवैधानिक प्रक्रिया र व्यापक राष्ट्रिय सहमतिका आधारमा अघि बढ्नुपर्ने उल्लेख गर्दै रेग्मीले असहमतिहरूको समाधान संवाद, संयम र विधिभित्रै खोजिनुपर्ने बताएका छन् ।

उनले प्राकृतिक विपत्ति र कमजोर अर्थतन्त्रका कारण मुलुक अप्ठ्यारो अवस्थामा रहेको उल्लेख गर्दै देशलाई अस्थिरतातर्फ धकेल्ने प्रवृत्तिप्रति चिन्ता व्यक्त गरेका छन् । त्यस्ता प्रवृत्तिलाई निस्तेज पार्नुपर्ने उनको भनाइ छ ।

यस वर्षको दसैँ प्राकृतिक विपत्ति र बाढीपहिरोका कारण प्रभावित भएको उल्लेख गर्दै रेग्मीले घरबास गुमाएर अस्थायी आश्रयमा बस्न बाध्य पीडितको आँसु पुछ्नु र उनीहरूको जीवन सामान्य बनाउन सहयोग गर्नु सबैको दायित्व भएको बताएका छन् ।

उनले राहत, पुनःस्थापना र पुनर्निर्माणलाई प्राथमिकतामा राख्न सरकारको ध्यानाकर्षण गराउँदै आआफ्नो क्षमताअनुसार विपद् प्रभावितलाई सहयोग गर्न सबैमा आह्वान गरेका छन् ।

विदेशमा रहेका लाखौँ नेपाली युवाको श्रम र पसिनाले देशको अर्थतन्त्रमा योगदान पुर्‍याइरहेको उल्लेख गर्दै रेग्मीले स्वदेशमै सम्मानजनक रोजगारी र अवसर सिर्जना गर्नुपर्ने आवश्यकता औँल्याएका छन् । युवाको ऊर्जा, सुशासन, भ्रष्टाचारमुक्त प्रशासन र निष्पक्ष न्यायलाई उनले समृद्ध नेपालको आधारका रूपमा प्रस्तुत गरेका छन् ।

विजयादशमी असत्यमाथि सत्य र अन्यायमाथि न्यायको विजयको प्रतीक भएको उल्लेख गर्दै उनले यस पर्वले सबैलाई सत्य र न्यायको मार्गमा अडिग रहने प्रेरणा दिने विश्वास व्यक्त गरेका छन् ।

पूर्वअध्यक्ष रेग्मीले तडकभडक नगरी सौम्य र निष्ठापूर्वक दसैँ मनाउन आग्रह गर्दै पर्वले आपसी सद्भाव बढाउने, पारिवारिक मिलन गराउने र नयाँ पुस्तामा संस्कृति तथा मूल्य मान्यता हस्तान्तरण गर्ने विश्वास व्यक्त गरेका छन् ।

उनले दुर्गा भवानीले देशलाई उन्नति, प्रगति, स्थिरता र समृद्धिको बाटोमा अघि बढाउन सबैलाई शक्ति प्रदान गरून् भन्ने कामनासहित स्वदेश तथा विदेशमा रहेका सम्पूर्ण नेपालीलाई बडादसैँको शुभकामना दिएका छन् ।