काठमाडौं – वैदेशिक रोजगारीका क्रममा निधन भएका धादिङका सन्तोष राईको शव नेपाल ल्याउन लाग्ने सम्पूर्ण खर्च र कानुनी प्रक्रिया सरकारले व्यहोर्ने भएको छ ।

रास्वपा सांसद आशिका तामाङका अनुसार शव ल्याउने कार्गो तथा कानुनी प्रक्रियाको खर्च सरकारले नै व्यहोर्ने निश्चित भएको हो । सबै प्रक्रिया पूरा गरी करिब १५ दिनभित्र शव नेपाल आइपुग्ने बताइएको छ ।

यसअघि आर्थिक अभावका कारण शव ल्याउन सहयोगको अपिल गरिएको थियो । अब सरकारले खर्च व्यहोर्ने भएपछि थप सहयोग आवश्यक नरहेको सांसद तामाङले स्पष्ट पारेकी छन्। यसअघि संकलित रकम भने राईको काजक्रिया तथा छोराछोरी र बुबाको हेरचाहमा प्रयोग गरिने उनले बताएकी छन् ।

सरकारसँगको यही विषयलाई लिएर केही दिनदेखि असन्तुष्ट रहेकी तामाङले मंगलबार संसद् समेत बहिष्कार गरेकी थिइन् । सरकारले प्रक्रिया अघि बढाएपछि उनले सामाजिक सञ्जालमा ‘अबदेखि मर्यादामा रहेर रिसाउने छु’ भन्दै व्यङ्ग्यात्मक प्रतिक्रिया दिएकी छन् ।