काठमाडौं– अग्रगामी मोर्चाले जनमत पार्टीका अध्यक्ष डा. चन्द्रकान्त (सीके) राउतलाई मोर्चाको प्रवक्ताको जिम्मेवारी दिएको छ।

नेकपा छाडेका नेता जनार्दन शर्मासहितको मंगलबार बसेको मोर्चाको बैठकले राउतलाई प्रवक्ता बनाउने निर्णय गरेको हो। 

बैठकले आगामी प्रदेश निर्वाचनसम्म मोर्चामा आबद्ध कुनै पनि दल सरकारमा सहभागी नहुने निर्णयसमेत गरेको छ। यससँगै मोर्चाले तत्काल सरकारमा सहभागिताभन्दा निर्वाचन केन्द्रित राजनीतिक गतिविधिलाई प्राथमिकता दिने संकेत गरेको छ।

अग्रगामी मोर्चामा उपेन्द्र यादव नेतृत्वको जनता समाजवादी पार्टी, सीके राउत नेतृत्वको जनमत पार्टी, प्रभु साह नेतृत्वको आम जनता पार्टीसहित नागरिक उन्मुक्ति पार्टी, प्रगतिशील लोकतान्त्रिक पार्टी, नेपाल संघीय समाजवादी पार्टी, बहुजन एकता पार्टी र खम्बुवान राष्ट्रिय मोर्चा आबद्ध छन्।