कुवेत– इरानले गरेको आक्रमणबाट कुवेतको विद्युत् उत्पादन तथा समुद्री पानी प्रशोधन (डिसालिनेसन) केन्द्रमा क्षति पुगेको छ ।

खाडी क्षेत्रमा महत्वपूर्ण मानिने जल पूर्वाधारहरूमा आक्रमण हुन थालेपछि खानेपानी आपूर्ति प्रणालीप्रति चिन्ता बढेको छ। 

कुवेती अधिकारीहरूका अनुसार शुक्रबार भएको आक्रमणबाट विद्युत् उत्पादन केन्द्रका केही एकाइमा क्षति पुगेको थियो भने परिसरमा आगलागीसमेत भएको थियो। आगो नियन्त्रणमा लिइसकिएको र अत्यावश्यक सेवाहरू नियमित राख्न आपतकालीन व्यवस्था लागू गरिएको अधिकारीहरूले बताएका छन्।

कुवेतको खानेपानी प्रणाली समुद्री पानी प्रशोधन केन्द्रमा अत्यधिक निर्भर छ। देशको करिब ९० प्रतिशत खानेपानी डिसालिनेसन प्रक्रियाबाट प्राप्त हुने बताइएको छ। मध्यपूर्वका अन्य देशहरू पनि यही प्रविधिमा निर्भर छन्। ओमानमा करिब ८६ प्रतिशत र साउदी अरेबियामा करिब ७० प्रतिशत खानेपानी समुद्री पानी प्रशोधनमार्फत आपूर्ति हुने गर्छ।

फारसी खाडीको तटीय क्षेत्रमा रहेका अधिकांश डिसालिनेसन केन्द्रहरू सम्भावित द्वन्द्व क्षेत्र नजिक छन्। विज्ञहरूले क्षेप्यास्त्र, ड्रोन वा अन्य आक्रमणबाट यस्ता पूर्वाधारमा क्षति पुगे लाखौँ मानिसको खानेपानी आपूर्ति प्रभावित हुन सक्ने चेतावनी दिएका छन्।

इरानसँगको बढ्दो तनावका कारण यसअघि ऊर्जा बजार र होर्मुज जलडमरूमध्यबाट हुने समुद्री यातायातमा पर्ने प्रभावबारे बढी चर्चा हुँदै आएको थियो। तर पछिल्ला घटनाले पानी आपूर्ति प्रणाली पनि क्षेत्रीय सुरक्षाको महत्वपूर्ण हिस्सा रहेको देखाएको छ।

यसअघि पनि खाडी क्षेत्रमा रहेका केही डिसालिनेसन केन्द्रहरू द्वन्द्वको प्रभावमा परेका थिए। कुवेतले दोहा वेस्ट डिसालिनेसन केन्द्रमा भएको क्षतिको जानकारी दिँदै उक्त क्षति अवरोध गरिएको ड्रोनका भग्नावशेष वा नजिकैको बन्दरगाह क्षेत्रमा भएको आक्रमणका कारण हुन सक्ने बताएको थियो।

यस्तै, इरानले मार्च महिनामा अमेरिकाले केश्म टापुस्थित डिसालिनेसन केन्द्रहरूलाई लक्षित गरी आक्रमण गरेको आरोप लगाएको थियो। तेहरानका अनुसार त्यस घटनाबाट करिब ३० गाउँको खानेपानी आपूर्ति प्रभावित भएको थियो। तर अमेरिकाले भने त्यस्तो कुनै आक्रमण गरेको स्वीकार गरेको छैन।

साउदी अरेबियाको जल पूर्वाधार पनि विगतमा सुरक्षाको चुनौतीमा परेको थियो। क्षेत्रीय तनाव बढेका बेला यमनका हुथी विद्रोहीहरूले साउदीका केही महत्वपूर्ण पूर्वाधारलाई लक्षित गर्दै आक्रमण गरेका थिए।