काठमाडौं- पाकिस्तानमा मध्यपूर्वको युद्धका कारण तरल प्राकृतिक ग्यासको अभाव भएपछि विद्युत कटौती (लोडसेडिङ) को समस्या चुलिएको छ। गर्मीको उच्च मागका बेला इन्धन आपूर्तिमा अवरोध आउँदा पाकिस्तानको विद्युत संकट थप गहिरिएको हो ।

पाकिस्तानी ऊर्जा मन्त्रालयका अनुसार बुधबार साँझ विद्युतको माग र आपूर्तिबीचको खाडल ४,५०० मेगावाट पुगेको छ । यो कूल मागको करिब एक चौथाइ हिस्सा हो । लोडसेडिङका कारण सर्वसाधारण मात्र नभई उद्योगधन्दा पनि नराम्ररी प्रभावित भएका छन्।

उद्योगीहरूले हाल दैनिक आठ घण्टासम्म लोडसेडिङ खेप्नु परेको बताएका छन्, जसले निर्यात र स्थानीय उत्पादनमा ठूलो धक्का पुर्‍याएको छ। पाकिस्तानले आफ्नो पावर सेक्टरका लागि आवश्यक पर्ने लगभग सबै ग्यास कतारबाट आयात गर्ने गर्दछ।

अहिले अभाव टार्न खुला बजारबाट ग्यास किन्ने सोच बनाए पनि चर्को मूल्य मुख्य बाधा बनेको छ।