ललितपुर – ‘वर्षा र सहकालका देवता’का रूपमा पुजिने रातो मच्छिन्द्रनाथको रथारोहण शनिबार सम्पन्न भएको छ । रथारोहणसँगै यस वर्षको जात्रा विधिवत् रूपमा सुरु भएको छ ।

हरेक वर्ष वैशाख शुक्ल पक्ष प्रतिपदाको दिन साइत निकालेर मच्छिन्द्रनाथलाई रथमा विराजमान गराउने परम्पराअनुसार यस वर्ष पनि रथारोहण सम्पन्न गरिएको हो ।

परम्पराअनुसार त:बहालबाट देवताको मूर्तिलाई खटमा राखेर पुल्चोकमा निर्माण गरिएको रथमा पुर्‍याई विधिवत् रूपमा विराजमान गराइएको छ । यससँगै जात्रा औपचारिक रूपमा सुरु भएको मानिन्छ ।

मच्छिन्द्रनाथलाई वर्षको ६ महिना त:बहाल मन्दिर र बाँकी ६ महिना बुङ्मतीमा राख्ने परम्परा रहेको छ । यसअघि देवतालाई बुङ्मतीबाट ल्याई पाटनको त:बहालमा स्थापना गरिएको थियो ।

करिब ३२ हात लामो र झण्डै ४८ फिट अग्लो रथ परम्परागत शैलीमा निर्माण गरिएको हो । रथ तान्ने साइत पञ्चाङ्ग निर्णायक समिति, स्थानीय गुठी तथा ज्यापु समुदायसँगको समन्वयमा निर्धारण गरिने गरिन्छ ।

यस जात्रालाई उपत्यकाकै महत्वपूर्ण सांस्कृतिक पर्वका रूपमा लिइन्छ, जसमा हजारौँ श्रद्धालु सहभागी हुने गर्छन् ।