काठमाडौं- इरानी उपविदेशमन्त्री सइद खातिबजादेहले अमेरिकी राष्ट्रपति डोनाल्ड ट्रम्पको पछिल्लो टिप्पणीको कडा आलोचना गर्दै उनले ‘धेरै बोल्ने’ गरेको बताएका छन् । टर्कीमा आयोजित अन्टाल्या कूटनीतिक मञ्चमा सञ्चारकर्मीहरूसँग कुरा गर्दै खातिबजादेहले ट्रम्पका भनाइहरू विरोधाभासपूर्ण हुने गरेको टिप्पणी गरे ।

आगामी बुधबारसम्म कुनै सम्झौता नभए अमेरिकाले पुनः ‘बम खसाल्न सुरु गर्ने’ भन्ने ट्रम्पको चेतावनीबारे सोधिएको प्रश्नमा उनले भने, “उनले एउटै वक्तव्यमा परस्पर विरोधी कुराहरू गरिरहेका छन्, उनले वास्तवमा के भन्न खोजेका हुन् भन्ने नै स्पष्ट छैन ।”

खातिबजादेहले युद्धले कुनै पनि सकारात्मक नतिजा ल्याउन नसक्ने इरानको विश्वास रहेको प्रस्ट पारे । यद्यपि, यदि इरानमाथि आक्रमण भएमा देशको रक्षाका लागि आफूहरू सधैँ तयार रहेको पनि उनले उल्लेख गरे । उनले इरानले आफ्नो अस्तित्वको लडाइँ अन्तिम सिपाही रहेसम्म लड्ने चेतावनी समेत दिएका छन् ।