नयाँदिल्ली- भारतको मध्येप्रदेशस्थित इन्दौर सहरमा विद्युतीय कार चार्ज गर्ने क्रममा सर्ट सर्किट हुँदा आगलागी भएको छ

यो आगलागीबाट तीन तले घर पूरै ध्वस्त भएको छ। यस दुर्घटनामा एकजना व्यवसायी मनोज पुगलिया र उनकी गर्भवती बुहारी सिमरनसहित ८ जनाको मृत्यु भएको छ । यो दुर्घटनामा अन्य ४ जना घाइते भएका छन्।

मृतकमध्ये ६ जना मनोजका आफन्त हुन्, जो मंगलबार बिहारको किशनगञ्जबाट आएका थिए। घटना बुधबार बिहान करिब ३:३० देखि ४ बजेको बीचमा बंगाली चौराहानजिक ग्रेटर बृजेश्वरी कोलोनीमा भएको हो।

प्रहरीका अनुसार, कारबाट फैलिएको आगो घरभित्रका ग्यास सिलिन्डरमा पुगेपछि एकपछि अर्को गर्दै विस्फोट हुन थालेका थिए।

विस्फोट यति शक्तिशाली थियो कि घरको एक भाग भत्किएको थियो। विद्युत आपूर्ति बन्द भएपछि घरमा जडान गरिएको डिजिटल लकसमेत खुल्न सकेन, जसका कारण भित्र सुतिरहेका मानिसहरू बाहिर निस्कनै पाएनन्।

स्थानीय बासिन्दाका अनुसार, दमकल टोली सूचना दिएको करिब एक घण्टापछि मात्रै घटनास्थलमा पुगेको थियो।

बिहारको किशनगञ्ज निवासी बिजुली देवीका अनुसार विजय सेठिया कस्मेटिक व्यवसायसँग सम्बन्धित थिए। उनलाई क्यान्सर भएकाले उपचारका लागि परिवारसहित छोरी–ज्वाइँको घर इन्दौर गएका थिए।

छिमेकी व्यापारी सौरभका अनुसार, उपचारका लागि इन्दौर पुगेका विजय सेठियाको यसै दुर्घटनामा उनकी पत्नी, छोरा, बहिनी र भिनाजुसहित स्वयंको पनि मृत्यु भएको छ।

सौरभका अनुसार, विजय सेठियाको किशनगञ्जमा दुई वटा पसल छन् । उनी नयाँ घर निर्माणमा पनि लागेका थिए। केही दिनअघि मात्रै उनी इलेक्ट्रोनिक सामान लिएर उनको घर पुगेका थिए।