काठमाडौं- भारत र फिजीबीच कृषि, चिनी उत्पादन, पशुधन र ग्रामिण विकासजस्ता क्षेत्रमा सहकार्य थप अभिवृद्धि गर्ने सहमति भएको छ । फिजीका कृषि तथा जलमार्गमन्त्री टोमासी टुनाबुना र भारतका कृषि तथा किसान कल्याणमन्त्री शिवराज सिंह चौहाणले यसबारे सहमति जनाएका हुन् ।

भारत भ्रमणमा रहेका टुनाबुनाले नयाँ दिल्लीस्थित कृषि भवनमा चौहाणसँग भेटवार्ता गरी यस्तो सहमति जनाएका हुन् । दुई देशका मन्त्रीले द्विपक्षीय सहकार्यलाई थप मजबुत बनाउने प्रतिबद्धतासमेत जनाएका छन् ।

भेटवार्ताका क्रममा मन्त्री टुनाबुनाले फिजी सरकार र फिजियन जनताको अभिवादन पेश गरेका थिए । द अस्ट्रेलिया टुडेका अनुसार फिजीले पछिल्लो समय आधुनिक, जलवायु सहनशील र प्रविधिमा आधारित कृषि उद्योगको विकास गर्ने पहल गरिरहेको छ ।

यसका लागि डिजिटल तथा स्मार्ट कृषि, ड्रोन प्रविधि, नानो मलखाद, कृषि प्रशोधन, पशुधन एवम् दूग्ध क्षेत्रको विकास, चिनी उद्योग तथा चक्रीय जैविक अर्थतन्त्रतर्फ फिजी सरकारले पहल गरिरहेको छ । यसका लागि भारतको सहयोग आवश्यक रहेको मन्त्री टुनाबुनाले जनाएका छन् ।