काठमाडौं – बलिउड अभिनेता अक्षय कुमार र निर्देशक प्रियदर्शन नयाँ फिल्ममा सहकार्य गर्ने भएका छन्। यस फिल्ममा अक्षय बाघ शिकारी अर्थात् ‘टाइगर हन्टर’को भूमिकामा देखिने भएका छन्।

सन् १९७० को दशकको परिवेशमा आधारित रहने फिल्मको नाम भने सार्वजनिक गरिएको छैन। प्रियदर्शनको निर्देशन करिअरको ९९औँ फिल्मका रूपमा रहने यस परियोजनालाई रमेश तौरानीले निर्माण गर्नेछन्।

फिल्मको छायाङ्कन आगामी नोभेम्बरको अन्तिम साताबाट सुरु गर्ने तयारी छ। करिब तीन महिनासम्म चल्ने छायाङ्कन राजस्थानका जंगल र मुम्बईमा निर्माण गरिने सेटमा हुनेछ। यसका साथै भोपालका विभिन्न स्थानमा पनि छायाङ्कन गर्ने सम्भावनाबारे निर्माण टोलीले अध्ययन गरिरहेको छ।

फिल्ममा अक्षयसँगै अभिनेता अन्नु कपुर र कमेडियन राजपाल यादव पनि महत्त्वपूर्ण भूमिकामा देखिनेछन्। अभिनेत्रीको छनोट भने टुङ्गिन बाँकी छ। फिल्मको पटकथा प्रियदर्शन र रोहन शंकरले संयुक्त रूपमा लेखेका हुन्।

अक्षय र प्रियदर्शनको सहकार्य सन् २००० मा प्रदर्शन भएको चर्चित कमेडी फिल्म ‘हेरा फेरी’बाट सुरु भएको थियो। त्यसपछि उनीहरूले ‘गरम मसाला’, ‘भागम भाग’, ‘भूल भुलैया’, ‘दे दना दन’ र ‘खट्टा मीठा’जस्ता फिल्ममा सँगै काम गरेका छन्।

यसअघि ‘भूत बंगला’मा पनि सहकार्य गरेका अक्षय र प्रियदर्शनको नयाँ फिल्मले दर्शकमाझ उत्सुकता बढाएको छ। सन् १९७० को दशकको परिवेश, बाघ शिकारीको भूमिकामा अक्षयको प्रस्तुति र प्रियदर्शनको निर्देशनले फिल्मलाई कस्तो रूप दिनेछ भन्ने चासो छ।