काठमाडाैँ – आन्तरिक राजस्व विभागले सञ्चालन गरिरहेको ‘करदाता प्रोत्साहन उपहार कार्यक्रम’ अन्तर्गत असोज महिनाको दोस्रो पाक्षिक (असोज १६ देखि मसान्तसम्म) का विजेता आइतबार घोषणा गरिँदै छ।

नयाँ सडकस्थित विशाल बजार परिसरमा बिहान १० बजे आयोजना गरिने कार्यक्रममार्फत कुल १७ जना भाग्यशाली करदातालाई विजेता चयन गरिने विभागले जनाएको छ।

विभागका अनुसार यो साताको उपहार घोषणामार्फत १६ जनालाई दैनिक १-१ लाख रुपैयाँ (करकट्टी पछि खूद १ लाख ३४ हजार ३३४ रुपैयाँ पाउने गरी) र बम्पर पुरस्कार स्वरूप एक जनालाई खूद ७ लाख ५० हजार रुपैयाँ (करकट्टीबाहेक १० लाख रुपैयाँ) प्रदान गरिनेछ।

विजेताहरूको घोषणा हास्य कलाकारद्वय दीपकराज गिरी र दीपाश्री निरौलाले गर्ने कार्यक्रम रहेको छ।

कार्यक्रममा प्रधानमन्त्री तथा मन्त्रिपरिषद्को कार्यालय, अर्थ मन्त्रालय र आन्तरिक राजस्व विभागका उच्चपदस्थ अधिकारीहरूको सहभागिता रहने आन्तरिक राजस्व विभागका उपमहानिर्देशक जनकराज शर्माले जानकारी दिए।