काठमाडौं– ‘जारी’ र ‘जारी २’ जस्ता चर्चित चलचित्र निर्देशन गरेका उपेन्द्र सुब्बा अब नयाँ कथासहित दर्शकमाझ आउने भएका छन् । उनको निर्देशनमा बन्न लागेको चलचित्र ‘बखत्ते’ को शुक्रबार ललितपुरस्थित महालक्ष्मी मन्दिर परिसरमा शुभमुहूर्त गरिएको छ ।

आन्भी फिल्म्सको प्रस्तुति तथा कबड्डी फिल्म्सको सहकार्यमा बन्ने चलचित्रमा विपिन कार्की र मिरुना मगर मुख्य भूमिकामा देखिनेछन् । फिल्मको कथा तथा पटकथा लेखन पनि निर्देशक सुब्बाकै हो ।

लामो समय लिएर ‘बखत्ते’ निर्देशन गर्न लागेको बताउँदै सुब्बाले यस पटकको कथा दर्शकले रुचाउने विश्वास व्यक्त गरेका छन् । ‘इमानदार भएर कथा लेखेको छु, सिनेमा पनि इमानदार भएर बनाउनेछु,’ उनले भनेका छन् ।

विपिन र मिरुनासँगै फिल्ममा शिशिर बाङ्देल, अनुराग कुँवर, विनोद न्यौपाने, अनिल सुब्बा, शारदा गिरी, उषा किरण अधिकारी, मिस्री थापा, सुगम दुलाल, सहिष्मा खड्का, अनिशा काफ्ले र बालकलाकार रिन्जेन लामालगायत कलाकारको अभिनय रहनेछ ।

आशिषएच तामाङ र प्रदीपजी धामी निर्माता रहेको फिल्मका कार्यकारी निर्माता युवराज काफ्ले तथा सह–निर्माता अञ्जु पाण्डे र पुष्कर घिमिरे हुन्। पुरुषोत्तम प्रधानको छायांकन र निमेष श्रेष्ठको सम्पादन रहनेछ ।

फिल्ममा शुसान्त गौतम, प्रशान्त सिवाकोटी र समीर खरेलको संगीत रहनेछ । मुभिज डिजिटेनमेन्ट डिजिटल पार्टनर रहेको ‘बखत्ते’को काठमाडौंमा एप्पल इन्टरटेनमेन्ट र मोफसलमा कुबेर सिने डिस्ट्रिब्युसन्सले वितरण गर्नेछ । अब सुब्बाको निर्देशन, विपिन–मिरुनाको जोडी र नयाँ कथाले ‘बखत्ते’लाई कस्तो फिल्म बनाउनेछ भन्ने चासो बढेको छ ।