काठमाडौं– सिद्धार्थ क्यापिटल लिमिटेडले आफ्नो व्यवस्थापनमा सञ्चालित सिद्धार्थ म्युचुअल फण्ड अन्तर्गतका दुई बन्दमुखी योजनाहरूको आर्थिक वर्ष २०८०/८१ का लागि प्रतिफल (नगद लाभांश) घोषणा गरेको छ ।

कम्पनीको भदौ १ गते बसेको सञ्चालक समितिको २०३औं बैठकले आर्थिक वर्ष २०८०/८१ को लेखापरीक्षण कार्य सम्पन्न भए पश्चात् लाभांश वितरण गर्ने निर्णय गरेको हो ।

घोषणा गरिएका तथ्यांक अनुसार, सिद्धार्थ इन्भेष्टमेन्ट ग्रोथ स्किम–२ का इकाई धनीहरूलाई ८ प्रतिशत (कर सहित) का दरले कुल नौ करोड साठी लाख रुपैयाँ प्रतिफल वितरण गरिनेछ । त्यसैगरी, सिद्धार्थ इन्भेष्टमेन्ट ग्रोथ स्किम–३ का इकाईधनीहरूले १० प्रतिशत (कर सहित) का दरले कुल आठ करोड पाँच लाख असी हजार रुपैयाँ प्रतिफल प्राप्त गर्नेछन् ।

क्यापिटलले सोही बैठक मार्फत सिद्धार्थ म्युचुअल फण्ड अन्तर्गतकै अन्य दुई योजनाहरू सिद्धार्थ इक्विटी फण्ड र सिद्धार्थ इक्विटी फण्ड २ का इकाई धनीहरूलाई भने यस वर्ष लाभांश वितरण नगर्ने जानकारी दिएको छ ।

लाभांश वितरण प्रयोजनका लागि बुक क्लोज हुने मिति भने पछि प्रकाशन गरिने कम्पनीले जनाएको छ ।