काठमाडौं- नेकपा (एमाले)का अध्यक्ष एवम् पूर्वप्रधानमन्त्री केपी शर्मा ओलीले वालेन्द्र शाह नेतृत्वको सरकार अरू पार्टीविरुद्ध योजनाबद्ध रूपमा गलत सूचना फैल्याउने अभियान चलाइएको आरोप लगाएका छन्।

शुक्रबार च्यासलस्थित एमाले केन्द्रीय कार्यालयमा पार्टीको वेबसाइट तथा मोबाइल एपको नवीन संस्करण सार्वजनिक कार्यक्रममा बोल्दै ओलीले बालेन्द्र शाह नेतृत्वमा ‘गोयबल्सभन्दा पनि महागोयबल्स शैली’ अपनाएर अरूलाई बदनाम गर्ने प्रयास भइरहेको दाबी गरे।

उनले समाजमा झूट र गलत सूचना फैलाउने प्रवृत्ति बढ्दै गएको उल्लेख गर्दै त्यसको सबैभन्दा बढी असर एमालेमाथि परेको बताए। ‘समाजलाई गलत सूचना दिएर हामीमाथि सबैभन्दा बढी प्रहार भएको छ। त्यसैले यसमा हामी सचेत हुनुपर्छ,’ उनले भने।

ओलीले पार्टीले आफ्ना गतिविधि र उपलब्धिलाई डिजिटल माध्यमबाट नियमित रूपमा अद्यावधिक गर्नुपर्ने आवश्यकता औँल्याए। अहिलेको सूचना प्रविधिको युगमा एमाले आफ्नाविरुद्ध भएका ‘सूचना आक्रमण’को सामना गर्न केही पछि परेको स्वीकार गर्दै अब नयाँ ढंगले अघि बढ्ने बताए।

उनले एमाले चुनौतीका कारण कमजोर नभएको र पार्टी पुनः नवीकृत भएर अझ मजबुत रूपमा अघि बढ्ने दाबी गरे। ‘हामी धक्का खाएका हौँ, सिद्धिएका होइनौँ। हामी आफ्नै खुट्टामा उभिएको स्वतन्त्र पार्टी हौँ। अरूको सहारामा उठ्ने लहरो होइनौँ,’ उनले भने।

ओलीले एमालेलाई एक्ल्याउने प्रयास अझै बढ्ने दाबी गर्दै पार्टी त्यस्ता चुनौतीसँग नआत्तिने र निराश नहुने बताए। पुनर्जागरण र पुनर्उत्थानको क्षमता एमालेसँग रहेको उनको भनाइ थियो।

उनले आफ्नो नेतृत्वमा भएका विकास निर्माणका कामका तस्बिर र विवरण डिजिटल माध्यममा व्यापक रूपमा सार्वजनिक गर्न कार्यकर्तालाई आग्रह गर्दै सूचना प्रविधिको प्रभावकारी उपयोग गर्नुपर्नेमा जोड दिए।