काठमाडौं– फिफा विश्वकपको फाइनलमा अर्जेन्टिना र स्पेनबीच प्रतिस्पर्धा हुँदै गर्दा क्लब फुटबलबाट एउटा रोचक तथ्य सार्वजनिक भएको छ । 

फाइनलमा सबैभन्दा धेरै खेलाडी प्रतिनिधित्व गराउने क्लब स्पेनको एट्लेटिको म्याड्रिड बनेको छ ।

डिएगो सिमियोनेको प्रशिक्षणमा रहेको एट्लेटिको म्याड्रिडका कुल ९ खेलाडी विश्वकप फाइनलमा सहभागी हुनेछन् । स्पेनिस क्लब बार्सिलोनाका ८ खेलाडी फाइनल खेल्ने भएकाले एट्लेटिको एकजनाले अगाडि रहेको छ ।

अर्जेन्टिनातर्फ एट्लेटिकोका जुआन मुस्सो, नाहुएल मोलिना, जुलियानो सिमियोने, थियागो अल्माडा र जुलियन आल्भारेज फाइनलमा हुनेछन् । 

सुरूवातमा एट्लेटिकोको टोलीमा रहेका निकोलास गोन्जालेजको लोन सम्झौता प्रतियोगिताकै क्रममा सकिएपछि उनी युभेन्टस फर्किएकाले एट्लेटिकोका प्रतिनिधिको सूचीमा समावेश छैनन् ।

यस्तै स्पेनतर्फ मार्कोस योरेन्ते, मार्क पुबिल, आलेक्स बाएना र आलेहान्द्रो ग्रिमाल्दो एट्लेटिको म्याड्रिडका खेलाडीका रूपमा फाइनल खेल्नेछन् । 

ग्रिमाल्दो विश्वकपकै अवधिमा आधिकारिक रूपमा एट्लेटिकोमा आबद्ध भएका हुन् ।

उता बार्सिलोनाका जोआन गार्सिया, पाउ कुबार्सी, एरिक गार्सिया, गाभी, लामिन यामाल, डानी ओल्मो, पेड्री र फेरान टोरेस स्पेनको टोलीबाट फाइनल खेल्नेछन्।

एट्लेटिको म्याड्रिडका ९ खेलाडी विश्वकप फाइनलमा पुग्नु क्लबका लागि ऐतिहासिक उपलब्धि पनि हो। 

यो संख्या विश्वकप फाइनलमा एउटै क्लबका सबैभन्दा धेरै खेलाडी प्रतिनिधित्व गर्ने कीर्तिमानसँग बराबरी हो।

यसअघि युभेन्टसले १९३४ को विश्वकप फाइनलमा तथा पेञारोलले १९५० को विश्वकप फाइनलमा समान ९ खेलाडी प्रतिनिधित्व गराएका थिए।