काठमाडौँ – सेमिफाइनलमा पराजित भएपछि विश्वकपका टोली र समर्थक प्रायः घर फर्कन हतारिन्छन्। तर, विश्वकप २०२६ मा सेमिफाइनलमा रोकिएका फ्रान्स र इङ्गल्यान्ड भने शनिबार तेस्रो स्थानका लागि भिड्दै छन्, जसलाई फिफाले अचेल कांस्य भिडन्त भन्ने गर्छ।

धेरैजसो खेलाडीका लागि यो खेल निरर्थक जस्तै लागे पनि कतिपय टोलीका लागि भने विश्वकपको अन्तिम खेल खेलेर तेस्रो स्थान हासिल गर्नु ठूलो उपलब्धि मानिन्छ। यसबाहेक यो खेलले उत्कृष्ट गोलकर्तालाई दिइने ‘गोल्डेन बुट’ को होडमा पनि ठूलो फेरबदल ल्याउन सक्छ।

किन हुन्छ तेस्रो स्थानको खेल?
सैद्धान्तिक रूपमा यो खेल दुई शीर्ष टोलीबीचको रोमाञ्चक भिडन्त हो, जसले टोलीलाई फिफा विश्वकपको तेस्रो स्थान दिलाउँछ। व्यावसायिक दृष्टिले हेर्दा, आयोजक र फिफाका लागि यो खेल अतिरिक्त आम्दानीको स्रोत हो। साथै, बुधबारको सेमिफाइनल र आइतबारको फाइनलबीचको समय पूरा गर्न प्रसारणकर्ताहरूका लागि पनि यो उपयोगी माध्यम बन्ने गरेको छ।

तेस्रो स्थानको प्रतिस्पर्धा पहिलोपटक सन् १९३४ को दोस्रो विश्वकपमा सुरु गरिएको थियो, जहाँ जर्मनीले अस्ट्रियालाई ३–२ ले हराएको थियो। दोस्रो विश्वयुद्धअघि सन् १९३८ मा पनि यो खेल खेलिएको थियो, तर विश्वयुद्धपछिको १९५० को संस्करणमा भने यो भिडन्त भएन। त्यसपछि सन् १९५४ देखि निरन्तर रूपमा यो खेल सञ्चालन हुँदै आएको छ।

गोल्डेन बुटमा कस्तो प्रभाव पर्छ?
यो आधिकारिक फिफा खेल भएकाले यसमा गरिएका गोलहरू पनि गोल्डेन बुटको दौडमा गणना हुन्छन्। सन् १९५८ मा फ्रान्सका जस्ट फोन्टेनले पश्चिम जर्मनीविरुद्धको तेस्रो स्थानको खेलमा चार गोल गरेका थिए। सोही खेलका कारण उनले एकै विश्वकपमा १३ गोल गर्ने कीर्तिमान बनाएका थिए, जुन अहिलेसम्म कसैले तोड्न सकेको छैन।

पुरस्कार र नगद
तेस्रो हुने टोलीलाई छुट्टै ट्रफी वा मेडल प्रदान नगरिए पनि चौथो हुने टोलीको तुलनामा २० लाख अमेरिकी डलर (करिब २६ करोड रुपैयाँ) बढी नगद पुरस्कार दिइन्छ।

इतिहासमा फ्रान्स र इङ्गल्यान्ड
फ्रान्सले अहिलेसम्म खेलेका तीनवटा तेस्रो स्थानका प्रतिस्पर्धामध्ये दुईमा जित निकालेको छ। उसले सन् १९५८ मा पश्चिम जर्मनीलाई र १९८६ मा बेल्जियमलाई ४–२ ले हराएको थियो। सन् १९८२ मा भने पोल्यान्डसँग पराजित हुँदा फ्रान्सले मिसेल प्लाटिनी जस्ता मुख्य खेलाडीलाई विश्राम दिएको थियो।

अर्कोतर्फ इङ्गल्यान्डले भने तेस्रो स्थानका लागि खेलेका दुवै खेल गुमाएको छ। उसलाई सन् १९९० मा आयोजक इटालीले २–१ ले र २०१८ मा बेल्जियमले २–० ले पराजित गरेका थिए।