काठमाडौं- पाकिस्तान वायुसेनाको एउटा प्रशिक्षण विमान खैबर पख्तुनख्वाको मर्दान सहर नजिकै दुर्घटनाग्रस्त हुँदा विमानमा सवार दुवै पाइलटको मृत्यु भएको छ । सैन्य मिडिया शाखाका अनुसार विमान नियमित प्रशिक्षण उडानमा रहेको बेला उक्त दुर्घटना भएको हो । दुर्घटनामा पाकिस्तान वायुसेनाका फ्लाइट लेफ्टिनेन्ट मुहम्मद कासिम अब्दुल्लाह र पाकिस्तान नौसेनाका लेफ्टिनेन्ट ताहा अब्बासीको निधन भएको छ ।

उक्त दुर्घटनाको कारण पत्ता लगाउन वायुसेना मुख्यालयले एउता छानबिन समिति गठन गरेको इन्टर-सर्भिसेस पब्लिक रिलेसन (आईएसपीआर) ले जनाएको छ। दुर्घटनाप्रति डिफेन्स फोर्सका प्रमुख तथा सेना प्रमुख फिल्ड मार्सल असिम मुनिर, अन्य सेवा प्रमुखहरू र पाकिस्तानी सशस्त्र बलका सम्पूर्ण दर्जाहरूले दुःख व्यक्त गर्दै शोक सन्तप्त परिवारजनप्रति हार्दिक समवेदना प्रकट गरेका छन्।

यसैगरी राष्ट्रपति आसिफ अली जरदारीले पनि पाइलटहरूको निधनप्रति गहिरो दुःख व्यक्त गरेका छन् । उनले देशको रक्षाका लागि आफ्नो ज्यान आहुति दिने वीर पुत्रहरूको बलिदानलाई राष्ट्रले सधैं सम्झिरहने बताए । उपप्रधानमन्त्री तथा परराष्ट्रमन्त्री इशाक दारले पनि यस दुखद दुर्घटनाप्रति दुःख व्यक्त गर्दै दिवंगत पाइलटहरूप्रति श्रद्धाञ्जली अर्पण गरेका छन् ।