बेरूत- लेबनानमा युद्धविराम लागू भएसँगै हजारौँ विस्थापित नागरिकहरू आफ्ना घरतर्फ फर्किन थालेका छन्। यसका कारण मुख्य सडकहरूमा लामो ट्राफिक जाम देखिएको छ।

शुक्रबार बिहानदेखि बेरुतका दक्षिणी क्षेत्रहरू तथा दक्षिणी शहर र गाउँतर्फ मानिसहरूको आवागमन तीव्र भएको छ। बेरुत–सिडोन–टायर जोड्ने तटीय राजमार्गमा सवारीसाधनको लामो लाइन देखिएको छ।

लेबनानको सिडोन शहरमा युद्धविराम लागू भएसँगै शुक्रबार बिहान विस्थापितहरू घर फर्किन थालेका हुन्। यस द्वन्द्वका कारण विशेष गरी दक्षिणी लेबनानमा १० लाखभन्दा बढी मानिसहरू घर छाड्न बाध्य भएका थिए।

सडकहरूमा गाडीहरूको लामो लाइन देखिएको छ भने मानिसहरू झण्डा फहराउँदै अस्थायी राहतको खुशी मनाइरहेका छन्।

धेरै व्यक्तिहरूका हातमा हिजबुल्लाहका पूर्व प्रमुख हसन नसरल्लाहको तस्वीर पनि देखिएको छ। इजरायलले सेप्टेम्बर २०२४ मा गरेको मिसाइल आक्रमणमा नसरल्लाह मारिएका थिए।

इजरायलले नरसंहारकारी आक्रमण गरेपछि लाखौँ लेबनानी विस्थापित भएका थिए । उनीहरूका हजारौँ घर जथाभावी बम हानेर इजरायलले ध्वस्त पारिदिएको छ ।

तस्बिरहरू : एजेन्सीको सहयोगमा