काठमाडौं –वरिष्ठ कलाकार हरिवंश आचार्य शीर्ष भूमिकामा रहेको फिल्म ‘पाँच पाण्डव’ आगामी तिहारमा प्रदर्शनमा आउने भएको छ । 

निर्माण पक्षले शुक्रबार एक थिम पोस्टर सार्वजनिक गरी प्रदर्शन मिति तिहारलाई तोकेको हो । त्यहाँ गते भने किटान गरिएको छैन । 

यसपटक भाइटीका कात्तिक २५ गते परेको छ । त्यसभन्दा अगाडिको रिलिज डेट कात्तिक २० हो । यही वरपर यो फिल्म प्रदर्शनमा आउने देखिन्छ । 

फिल्मका प्रस्तुतकर्ता नवीन श्रेष्ठ भन्छन्, ‘वितरकहरूसँगको सल्लाहले हामी तिहारमा फिल्म प्रदर्शन गर्ने निर्णय लिएका हौं ।’

यस फिल्ममा हरिवंशसहित जितु नेपाल, आर्यन सिग्देल, महेश त्रिपाठी र सुशील श्रेष्ठ पाँच पाण्डवको भूमिकामा छन् । उनीहरूको भूमिकाबारे यहाँभन्दा थप खुलाइएको छैन । 

नायिकाहरूमा दीपाश्री निरौला र सरिता गिरी शीर्ष भूमिकामा रहेका छन् । 

काली रानी फिल्मस्को ब्यानरमा निर्माण भइरहेको यस चलचित्रलाई निर्देशक वसन्त निरौलाले निर्देशन गरिरहेका छन् । यस फिल्मको कथा र पटकथा सुशील पौडेलले लेखेका हुन् ।