काठमाडौं – नायिका स्वस्तिमा खड्का र नायक रवीन्द्रसिंह बानियाँ शीर्ष भूमिकामा रहेको फिल्म ‘लालीबजार’को गीत ’मायालाई के दिउँ म बैना’ टिकटकमा भाइरल भएको छ ।

युट्युबमा सार्वजनिक भएको यस गीतले १४ लाखभन्दा बढी भ्युज पाएको छ ।

टिकटक क्रिएटरहरूले भिडियोमा नायिका खड्का र बालकलाकार समाइरा थापाको डान्स स्टेपललाई मन पराएको पाइन्छ ।

उनीहरूले भिडियोको स्पेस्ट पछ्याउँदै टिकटक र रिल्स बनाएका छन् । एकलाखभन्दा बढी टिकटक प्रयोगकर्ताले उक्त गीतमा भिडियो बनाएर सार्वजनिक गरेका छन् ।

स्वस्तिमा र समाइराले छायाङ्कनको दौरान उक्त गीतमा नाचेको भिडियो पनि सार्वजनिक गरेका छन् । उक्त भिडियो पनि दर्शकले रुचाएका छन् ।

यसबारे नायिका स्वस्तिमा भन्छिन्, ‘हामीले दृश्य छायांकन गर्दा बचेको समयमा नृत्यको प्राक्टिस गर्थ्यौं । हाम्री बालकलाकार समाइराले गज्जब नृत्य गरेकी छिन् । उनको कामले पनि मलाई प्रेरणा मिल्थ्यो । यी सानी नानीले गज्जब गरेकी छिन्, मैले पनि मेहनत गर्नुपर्छ भन्ने लाग्थ्यो । हामी सबैको प्रयासले गीत राम्रो बन्यो र अहिले दर्शकले रुचाएको पाउँदा मेहनतको फल पाएको आभाष भएको छ ।’

यस गीतको भिडियोको कोरियोग्राफी प्रदीप लामा गरेका हुन् । गीतमा दीपिका बयाम्बु मगर र खेम सेन्चुरीको स्वर रहेको छ। साथै, सङ्गीत खेम सेन्चुरीकै रहेको छ भने शब्द रमेश बिजीले लेखेका हुन् ।

षट्कोण आर्ट्सको ब्यानरमा बनेको यस फिल्म आगामी वैशाख १८ बाट प्रदर्शनमा आउँदैछ ।

फिल्ममा कार्यकारी निर्माता प्रदीप भट्टराई रहेका छन् भने म्याक्स दीपेश खत्री र रविन्द्रसिंह बानियाँ निर्माता रहेका छन् । यस फिल्मको लेखक र निर्देशक यम थापा हुन् ।