काठमाडौं- पाकिस्तानका रक्षामन्त्री ख्वाजा आसिफले अमेरिकाले आफ्नो फाइदाका लागि पाकिस्तानको उपयोग गरेको र काम सकिएपछि ट्वाइलेट पेपर जस्तै फालेको बताएका छन् । संसदलाई सम्बोधन गर्दै उनले यस्तो बताएका हुन् ।

सम्बोधनका क्रममाउनले सन् १९७९ मा सोभियत संघको हस्तक्षेपको चर्चा गर्दै उक्त कदम अफगान सरकारको निमन्त्रणामा चालिएको बताए । तर, अमेरिकाले यसलाई सिधा आक्रमण भनेर आफ्नो तरिकाले भाष्य तयार गरेको उनको भनाइ छ ।

उनले सन् १९९९ पछि अमेरिकासँग भएको पाकिस्तानको नयाँ रणनीतिक साझेदारीमाथि प्रश्न उठाए । उनले सन् २००१ सेप्टेम्बर ११ को आक्रमणपछि अमेरिकासँग उभिएको मूल्य पाकिस्तानले आज पनि चुकाइरहेको बताए ।

अफगानिस्तानमा भएकोे युद्धमा सामेल हुनु पाकिस्तानको ठूलो गल्ती रहेको भन्दै उनले आज आफ्नो देशमा भइरहेको आतंकवादी गतिविधि पनि सोही गल्तीहरूको नतिजा भएको बताए ।