काठमाडौँ– नवलपरासी क्षेत्र नम्बर १ का नेकपा माओवादीका उम्मेदवारमाथि राष्ट्रिय स्वतन्त्र पार्टी (रास्वपा)का कार्यकर्ताले कुटपिट गरेको आरोप लागेको छ ।

नेकपाका उम्मेदवार राजुप्रसाद हरिजनमाथि रास्वपाका कार्यकर्ताले कुटेको आरोप छ । उम्मेदवार हरिजनले चुनाव प्रचारप्रसार गरिरहेका ठाउँमा पुगेका रास्वपाका कार्यकर्ताले उम्मेदवार उनीसहित उनका समर्थकमाथि कुटपिटसमेत गरेको बताइएको ।

कुटपिटबाट माओवादीका उम्मेदवार राजुप्रसाद हरिजन, क्षेत्रीय प्रचारप्रसार सहसंयोजक निरज पाठक, जिल्ला सदस्य नकुल सी र बर्दघाट नगर इन्चार्ज गणेश पाण्डे घाइते भएका छन् ।

‘म गाडीमाथि बसेर भाषण गरिरहेको थिए । सडक छेउमा रहेका रास्वपाका कार्यकर्ताको बीचबाट आएका ५÷६ जनाले घण्टीको एरियामा आएर प्रचारप्रसार किन गरेको ?,’ उनले भने, ‘भन्दै साथीहरुलाई कुटपिट गरे । छुट्टाउन जाँदा ममाथिसमेत निर्घात कुटपिट गरे ।’

कुटपिटबाट उनको टाउको र अनुहारमा चोट लागेको बताइएको छ ।