काठमाडौं- आईसीसी पुरुष विश्वकप लिग-२ अन्तर्गत शनिबारको खेलमा क्यानडाले नेपालसामु २ सय ५७ रनको लक्ष्य प्रस्तुत गरेको छ ।

ओमनको अल अमेरात मैदानमा जारी खेलमा ओपनिङ ब्याटर युवराज सम्राले शतक प्रहार गरेपछि क्यानडाले न‍ेपालसामु २ सय ५७ रनको लक्ष्य प्रस्तुत गरेको हो ।

सम्राले ११७ बलमा १०५ रन बनाए । यस क्रममा उनले ११ चौका र ४ छक्का प्रहार गरे ।

टस जितेर पहिले ब्याटिङ गरेको क्यानडाले ५० ओभरमा सबै विकेट गुमाउँदै २ सय ५६ रन बनायो । क्यानडाका लागि आरोन जोनसनले ३६, हर्ष थाकरले ३४ र हम्जा तारिकले ३० रन बनाए ।

नेपालका ललीत राजवंशीले ४ विकेट लिए भने सन्दीप लामिछानेले ३ तथा दीपेन्द्रसिंह ऐरीले २ र रोहित पौडेलले १ विकेट हात पारे ।

अंकतालिकामा नेपाल ३४ खेलबाट २८ अंकसहित छैटौं स्थानमा छ भने एक खेल बढी खेलेको क्यानडा २७ अंकसहित सातौँ स्थानमा छ ।