वासिङ्टन- अमेरिकी राष्ट्रपति डोनाल्ड ट्रम्पले यमनका हुथी विद्रोहीविरुद्ध इजरायलले प्रस्ताव गरेको सहयोग स्वीकार गर्न साउदी अरेबियालाई आग्रह गरेका छन्। उनले साउदी अरेबिया इजरायलसँग सम्बन्ध सामान्य बनाउने अब्राहम सम्झौतामा सहभागी हुने सम्भावना पनि बढेको बताएका छन् ।

सन् २०२३ अक्टोबर ७ मा हमासले इजरायलमाथि आक्रमण गर्नुअघि इजरायल र साउदी अरेबिया सम्बन्ध सामान्य बनाउने सम्झौताको नजिक पुगेका थिए । तर, साउदी अरेबियाले प्यालेस्टिनी राज्य स्थापनाका लागि स्पष्ट मार्ग सुनिश्चित हुनुपर्ने अडान राख्दै आएको छ ।

यसैबीच, इरानले हुथी विद्रोहीका आक्रमणमा आफ्नो संलग्नता अस्वीकार गर्दै द्वन्द्व अन्त्यका लागि मध्यस्थता गर्न तयार रहेको जनाएको छ ।

यमनको सरकारले हुथी विद्रोहीले एडन विमानस्थलमा दुईवटा क्षेप्यास्त्र प्रहार गरेको आरोप लगाएको छ । ती क्षेप्यास्त्र कायरो उड्न तयारी अवस्थामा रहेको विमाननजिक खसेका थिए । साउदी अरेबियास्थित अमेरिकी दूतावासले पनि सम्भावित आक्रमण र उडान अवरोधबारे आफ्ना नागरिकलाई सचेत गराएको छ ।

हुथीका सैन्य प्रवक्ता याह्या सारीले पछिल्लो २४ घण्टामा साउदी लडाकु विमानले यमनका विभिन्न क्षेत्रमा १०१ वटा हवाई तथा क्षेप्यास्त्र आक्रमण गरेको दाबी गर्नुभएको छ । उहाँका अनुसार हालसम्म यस्ता आक्रमणको सङ्ख्या दुई हजार ४८९ पुगेको छ ।

यता, साउदी नेतृत्वको सैन्य गठबन्धनले यानबुतर्फ प्रहार गरिएको एक ब्यालिस्टिक क्षेप्यास्त्र, लाल सागरमा दुईवटा क्रुज क्षेप्यास्त्र र तीनवटा ड्रोन नष्ट गरेको जनाएको छ ।

हुथीका आक्रमण र त्यसको जबाफी कारबाही तीव्र भइरहेका बेला साउदी अरेबियाको ऊर्जा पूर्वाधार तथा महत्त्वपूर्ण समुद्री मार्गको सुरक्षालाई लिएर चिन्ता बढेको छ ।