काठमाडौं- नेपाली कांग्रेसका पूर्वसभापति शेरबहादुर देउवा निकट दोस्रो तहका धेरै नेताहरू आज सभापति गगन थापाको निम्तो स्वीकार्दै केन्द्रीय कार्यसमितिको बैठकमा उपस्थित भएका छन् । यता देउवासहित शीर्ष नेताहरू प्रकाशमान सिंह, कृष्णप्रसाद सिटौला, विमलेन्द्र निधि, डा. शशांक कोइराला, रमेश लेखक, एनपी साउद, दीपक खड्का, कान्छाराम तामाङ लगायत भने चुनदेवीको सम्पर्क कार्यालयमा छुट्टै छलफलमा बसेका छन् ।

चुनदेवीको छलफलमा गएका नेता प्रकाशमान सिंहका अनुसार देउवा अझै पनि १४औँ महाधिवेशनको कार्यसमितिले नै १५औँ महाधिवेशन गर्नुपर्ने अडानमा छन् । उनले गगन थापा पक्षले एकलौटी रुपमा विशेष महाधिवेशन गरेको हुनाले त्यसलाई नस्वीकार्ने पक्षमा रहेको सिंहको भनाइ छ ।

कांग्रेसको देउवा पक्षले गरिरहेका विभिन्न गतिविधिबारे कांग्रेस नेता प्रकाशमान सिंहसँग खबरहबले कुराकानी गरेको छ । प्रस्तुत छ कुराकानीको सम्पादित अंश-

धेरै जना नेताहरू कांग्रेस एक बनाउने अभियान अन्तर्गत सानेपा जानुभएको छ, तपाईहरु के गर्नुहुन्छ ?

को कता गयो हामीलाई मतलब भएन । तर, हामी अहिले पनि पार्टी सम्पर्क कार्यालय चुनदेवीमा बैठक बसिरहेका छौँ । १५औँ महाधिवेशन गर्ने तयारी गरिराखेका छौँ । १४औं महाधिवेशनको नेतृत्वलाई नै लिएर १५औं महाधिवेशन गर्नुपर्छ भन्ने हाम्रा नेताहरूको कुरा छ । देउवा दाइ र हामी गगन कांग्रेसमा जाँदैनौँ । हामी छुट्टै तयारी गरिरहेका छौँ । हामी त्यही महाधिवेशन गर्छौँ ।

नेताहरूले के छलफल गरिरहनुभएको छ ?

आज हामी १५औं नियमित महाधिवेशन गर्ने सन्दर्भमा छलफलमा छौँ । १४औँ कार्यसमितिबाट १५औँ महाधिवेशन गर्ने तयारी र छलफलमा छौँ ।

एक हुने कुरा भएको छैन ?

छैन छैन । एक वर्ष भइसक्यो कहाँको एकता गर्ने र उहाँहरु आफ्नै लाइनमा हुनुहुन्छ । हामी अब आफ्नै तयारीमा जुटिसकेका छौं । हामी १४औँ महाधिवेशनबाट १५औं महाधिवेशनमा जान्छौँ । हाम्रो परम्परा के छ भने १४औँ महाधिवेशनबाट निर्वाचित कार्यसमितिले नै १५औँ महाधिवेशन गर्ने छ।

तपाईँहरू पक्षकै धेरै नेताहरू सानेपामा जुट्नुभयो नि ?

एक दुई जना जानुभयो होला । को धेरै नेता गएको छ ? र तपाईहरु आफैँ हिसाब गर्नुस् ।

देउवा दाइको कुरा के छ आज ?

नियमित महाधिवेशनमा जाने हो भनेर उहाँले त भनिरहनुभएको छ नि । १४औं कार्यसमितिले १५ औं महाधिवेशन गर्ने हो । शेरबहादुर देउवा दाइको जुन वर्किङ कमिटी छ, त्यही कमिटीले १५ औं महाधिवेशन गर्ने हो भन्नेमा उहाँ क्लियर हुनुहुन्छ ।

मिलन विन्दु चाहिँ के हो अब ?

चौधौँ महाधिवेशनलाई नै निरन्तरता दिएर १५ औं महाधिवेशनको तयारीमा जुट्यो भने मिलिन्छ । अरु कुराले मिल्ने अवस्था छैन।

तर, तपाईँहरूले राखेका धेरै बुँदाहरू पालना गर्‍यौँ, मिलेर अगाडि बढौँ, तपाईंलाई सम्मान गर्छौँ, कार्यक्रम उद्घाटन गरिदिनुहोस् भनेर गगन थापाले शेरबहादुर देउवालाई बोलाइरहनुभएको छ नि ?

पार्टीको विधि नीति र सिद्धान्त नमानी जबरजस्तL विशेष महाधिवेशन गरिएको छ, त्यसलाई स्वीकार्ने अवस्था छैन । पार्टीको नीति अनुसार विशेष महाधिवेशन नभएकाले हामीले मान्यता दिएका छैनौँ । त्यसकारण १४औंलाई नै मान्यता दिएर १५औँ गर्ने हो।

शेरबहादुर देउवालाई त तपाईँहरूले मिल्न दिनुभएन अरे नि गगन थापासँग ?

शेरबहादुर दाइलाई कसैले मिल्न नदिने भन्ने हुन्छ र ? उहाँले चाहिँ आफ्नो विवेक प्रयोग गर्नु हुन्न ? सर्वोच्च नेता भएको व्यक्तिले यतिसम्मको विषय नजान्नुहोला ? उहाँलाई होच्याउने किसिमको आशय कहिँ कतैबाट आइरहेको छ, यस्ता क्रियाकलापहरु रोकिनुपर्छ । यस्तैयस्तै कुरा गरेर नै पार्टीलाई एक नबनाउने किसिमका क्रियाकलापहरु भएका हुन् । यो कुरा जसले भनेको छ त्यो केटाकेटीपन बाहेक केही होइन ।

गगन र देउवाबीच भेटघाट भएर कुराकानी हुँदैछ रे हो ?

त्यो परिस्थितिको विषयमा हामीलाई दाइले जानकारी दिनुभएको छैन । मलाई लाग्छ त्यो परिस्थिति भइसकेको छैन क्यारे ।