काठमाडौं- नेपाली कांग्रेसका नेता चन्द्र भण्डारीले सानेपा पुगेर आफ्नै घर फर्किएको बताएका छन् । सभापति गगन थापाको निम्तो स्वीकार्दै सानेपा पुगेका भण्डारीले कहिलेकाहीँ पार्टीमा मनमुटाव भएपनि आफ्नै घर फर्किएको टिप्पणी गरे । सञ्चारकर्मीसँग कुराकानी गर्दै भण्डारीले पूर्वसभापति शेरबहादुर देउवा पनि चाँडै एक ठाउँमा आउने दाबी गरे ।

‘जन्मँदा यही घर थियो । चिह्न, झन्डा यही थियो । यो घरभित्र को कहिले आउँछ जान्छ । पार्टी हो’ भण्डारीले भने, ‘कहिलेकाहीँ मनमुटाव हुन्छ, लोभ हुन्छ । त्यसकारण पुरानो होइन, आफ्नै घरभित्र आएको हो ।’ भण्डारीले सञ्चारकर्मीसँग देउवा पनि सानेपा आउने दाबी गरे । उनले भने, ‘आउनुहुन्छ नि, कहाँ जानुहुन्छ ? यो उमेरमा उहाँलाई छोराछोरीले नस्याहारेर कसले स्याहार्छ ? आउनुहुन्छ ।’

देउवा पक्षकै नेता मीन विश्वकर्माले पनि करिब ९० प्रतिशत कांग्रेसका देउवा पक्ष नेताहरू तीन गतेबाट सुरु हुन लागेको महाधिवेशनमा सरिक हुने जानकारी गराएका छन् । नेपाली कांग्रेसको केन्द्रीय कार्यसमिति बैठक अहिले जारी छ ।

आजको बैठकमा १४औं महाधिवेशनमा निर्वाचित भएका केन्द्रीय सदस्य र कार्यसमितिलाई समेत निम्ता गरिएको थियो । त्यसै अनुरूप धेरै जना नेताहरू गगनको निम्तो स्वीकार्दै बैठकमा सरिक भएका छन् । विभाजनको डिलमा पुगेको नेपाली कांग्रेस एक हुने प्रक्रियामा रहेको धेरैजना नेताहरूले आकलन गरेका छन् ।