काठमाडौं– नेपाली कांग्रेसका पूर्वसभापति शेरबहादुर देउवाका विश्वासपात्र मानिने मीन विश्वकर्मा सानेपास्थित पार्टी केन्द्रीय कार्यालय पुगेका छन्।

बिहीबार बसेको केन्द्रीय कार्यसमिति बैठकमा सहभागी हुन पुगेका विश्वकर्माले सञ्चारकर्मीसँग कुरा गर्दै देउवा कांग्रेसको ‘सर्वोच्च नेता’ भएको बताएका छन्।

विश्वकर्माले पार्टीभित्र आफूहरूले राखेका केही माग पूरा भइसकेको र बाँकी माग पनि प्रक्रियामा रहेको बताए। उनले सभापति गगन थापाले आफूहरूको माग क्रमशः सम्बोधन गर्दै गएको दाबी गरे।

देउवालाई छाडेर गगन थापाको पक्षमा आएको भन्ने पत्रकारहरूको प्रश्नमा विश्वकर्माले देउवाको नेतृत्वप्रतिको सम्मान कायम रहेको संकेत गर्दै अन्य नेताहरूलाई पनि क्रमशः समेट्दै जाने बताए।

‘शेरबहादुरजी सर्वोच्च नेता हो। अरू पनि चाँडै आउनुहुन्छ,’ उनले भने। विश्वकर्माले आफूहरूले राखेका सर्तमध्ये केही पूरा भइसकेका बताएका छन् । उनले केही कार्यान्वयनको प्रक्रियामा रहेका बताएका छन्। ‘हामीले राखेका सर्तहरू केही पूरा हुँदैछन्, केही प्रक्रियामा छन्,’ उनले भने।

कांग्रेसभित्र पछिल्लो समय नेतृत्व र शक्ति समीकरणलाई लिएर विभिन्न तहमा छलफल भइरहेका बेला विश्वकर्माको यो भनाइ आएको हो।