काठमाडौं- नेपाली कांग्रेसले यही असोज १६ गतेदेखि पन्ध्रौँ महाधिवेशन तयारी गरिरहँदा पार्टीमा ध्रुवीकरण तीव्र भएको छ।

दुवैतिर नखुलेका शीर्ष नेता डाक्टर शेखर कोइराला र पूर्वकार्यवाहक सभापति पूर्णबहादुर खड्का दोधारमा रहेका बेला अन्य नेता भने चुनदेवी छाडेर सानेपातिर भित्रिन थालेका छन् ।

कांग्रेस कोइराला पक्षका नेता केदार कार्की र सभापति गगन थापानिकट नेताहरूले दिएको जानकारी अनुसार उनीहरू कुनै पनि महाधिवेशनमा सहभागी नभई बीचमा बस्ने परिस्थितिमा पुगेका हुन् ।

तत्कालीन सभापति देउवाले यो महाधिवेशनमा भाग नलिन भने पनि उनकै साथमा रहेका नेताहरूले चुनदेवी छाडेर सानेपामा भित्रिएका हुन् ।

यसरी देउवा क्याम्पलाई बाइबाइ गरेर सभापति गगन थापाको पक्षमा उभिन सानेपा भित्रिनेहरूमा अहिलेसम्म केही शीर्ष नेता छन्।

देउवाको साथ छाडेर गगन नेतृत्वको कांग्रेसतिरै जोडिने क्रममा नेतृ किरण यादव पनि सानेपा पुगेकी छन् । बिहीबार नेपाली कांग्रेस केन्द्रीय कार्यसमितिको बैठक बस्दैछ।

सानेपामा केन्द्रीय कार्यसमिति बैठक अघि बढ्दै गर्दा नेताहरू मीन विश्वकर्मा, ज्ञानेन्द्रबहादुर कार्की, राजीवविक्रम शाह र रामहरि खतिवडासहितका नेताहरू मिसिएका छन् । कांग्रेसको महाधिवेशनको मुखमा एकपछि अर्को नेताले छाड्दा देउवा पक्षलाई तनाव भएको छ।

अझ तत्कालीन कार्यवाहक सभापति खड्का र नेता कोइराला दुवैतिर नखुली रिजर्भ बसिदिँदा देउवाको तनाव बढेको छ। अब विस्तारै राजनीतिक भविष्य र सम्भावना देखेका नेताहरू संस्थापनको पक्षमा उभिएका हुन् ।