न्यूयोर्क- ब्राजिलका स्टार फरवार्ड नेयमारले जारी विश्वकपको नकआउट चरणका खेल खेल्ने सम्भावना कमजोर देखिएको छ। उनी टिममा फर्किने सम्भावना रहँदा समूह चरणका बाँकी खेल गुमाउने समाचार आएका छन् ।

३४ वर्षीय नेयमार अझै पनि ब्राजिलको दोस्रो समूह चरणको खेल हाइटीसँगको भिडन्तअघि प्रशिक्षणमा सामेल भएका छैनन्। उनले एक साताअघि गरेको मेडिकल परीक्षणले पूरा स्वस्थ भइनसकेको देखाएको हो।

चर्चित खेल अनलाइन ईएसपीएनका अनुसार गत मे १७ मा सान्तोसका लागि खेल्दा क्याल्फ चोट बोकेका नेयमारलाई विश्वकप टोलीमा समावेश गरिएको थियो ।

तर पनि उनी त्यसपछि टीमको प्रशिक्षणमा फर्किएका छैनन्। न्युयोर्क रेड बुल्सको प्रशिक्षण केन्द्रमा पनि उनको स्थिति उस्तै रहेको स्रोतहरूले जनाएका छन्।

ग्रेड टु मसल इन्जुरीबाट पीडित नेयमारले दोहोर्‍याएको मेडिकल परीक्षणको नतिजा अझै ब्राजिलियन फुटबल महासंघ (सीबीएफ) ले पुष्टि गरेको छैन।

ब्राजिलियन सञ्चारमाध्यमका अनुसार टोलीको मेडिकल स्टाफले उनलाई पूर्ण फिट भएर नकआउट चरणमा मात्रै फर्काउने आशा गरेको छ। यसले गर्दा उनले हाइटी र स्कटल्याण्डसँगका समूह चरणका खेल गुमाउने छन्।

नेयमार ब्राजिलको पहिलो खेलमा बेन्चमा थिए तर टिम कीटमा थिएनन्। ब्राजिलले शनिबार मोरोक्कोसँग १-१ को बराबरी खेलेको थियो। अब उनीहरूले शुक्रबार हाइटीसँग र समूह चरणको अन्तिम खेल जुन २४ मा स्कटल्याण्डसँग खेल्ने छन्।

प्रशिक्षक कार्लो एन्चेलोटीले नेयमारलाई सकेसम्म चाँडै टोलीमा फर्काउने बताए । ‘नेमार सकेसम्म चाँडो फर्किने प्रयास गरिरहेका छन्। उनी अर्को साता टोलीमा फर्किने हाम्रो अपेक्षा छ’, उनले भने

एन्चेलोटीले उनलाई टोलीमा उत्कृष्ट टेक्निकल क्षमता, अनुभव र युवा खेलाडीहरूलाई दिने उदाहरणका लागि पनि समावेश गरिएको बताए।

नेयमारको चोटले ब्राजिलको समूह चरणको यात्रालाई प्रभावित पार्ने देखिएको छ। टोली भने नकआउट चरणमा पुग्ने लक्ष्यसहित अघि बढिरहेको छ।