मियामी – फिफा विश्वकप २०२६ अन्तर्गत समूह ‘एच’ को आफ्नो पहिलो खेलमा म्याक्सी आराउजोले खेलको अन्तिम समयमा गोल गरेपछि उरुग्वेले साउदी अरेबियासँग १–१ गोलको बराबरी खेलेको छ।

गएराति मियामी रङ्गशालामा भएको यस खेलमा जित नजिक पुगेको साउदीको उरुग्वेले अंक खोसेको हो। यसअघि सोही समूहको अर्को खेलमा युरोपेली च्याम्पियन स्पेन केप भर्डसँग गोलरहित बराबरीमा रोकिइसकेको छ।

सन् २०२२ को विश्वकपको आफ्नो पहिलो खेलमा अर्जेन्टिनालाई २-१ ले हराएर सनसनी मच्चाएको साउदीले यसपटक पनि खेलको ४१ औँ मिनेटमा अब्दुलइलाह अलअम्रीको गोलमार्फत अग्रता लिएको थियो। मुसाब अलजुवेरको कर्नरमा मोहम्मद कान्नोको प्रहारलाई उरुग्वेका गोलकिपर फर्नान्डो मुस्लेराले बचाए पनि रिबाउन्डमा अलअम्रीले बललाई जालीको दिशा दिएका थिए।

स्पेनले अंक गुमाएको दिन उरुग्वेका प्रशिक्षक मार्सेलो बिएल्साले यस नतिजालाई गुमेको अवसरका रूपमा लिएका छन्। “हामीले जित्नैपर्ने प्रतिद्वन्द्वी थियो, पहिलो हाफमा हामीले सोचेजस्तो खेल्न सकेनौँ,” बिएल्साले खेलपछि असन्तुष्टि पोखे।

साउदी अरेबियालाई ऐतिहासिक अंक दिलाउन गोलकिपर मोहम्मद अलोवाइसले उत्कृष्ट प्रदर्शन गरे। उनले फेडेरिको विनासका कतिपय प्रहार र खेलको अन्तिमतिर फेडेरिको भाल्भर्डे तथा जोसे मारिया जिमेनेजका सशक्त प्रहारलाई विफल बनाएका थिए। सन् १९९४ पछि पहिलो पटक नकआउट चरणमा पुग्ने लक्ष्य राखेको साउदीका प्रशिक्षक जर्जियोस डोनिसले टोलीको प्रदर्शनप्रति खुसी व्यक्त गरे।

खेलको ८० औँ मिनेटमा विनासको हेड प्रहारलाई साउदी गोलकिपर अलोवाइसले रोके पनि रिवाउन्डमा आएको बललाई विङ्गर आराउजोले नियन्त्रणमा लिँदै नजिकको पोस्टबाट गोल गरेर उरुग्वेको संकट टारेका थिए। खेलपछि उरुग्वेका कप्तान विनासले पहिलो खेलको दबाब र हतारोका कारण सोचेजस्तो नतिजा आउन नसकेको बताए।