काठमाडौं- इंग्लिस प्रिमियर लिग फुटबलमा लिभरपुललाई हराउँदै एस्टन भिल्लाले अर्को सिजन युइएफए च्याम्पियन्स लिग खेल्ने पक्का भएको छ ।

आज बिहान भिल्ला पार्क मैदानमा सम्पन्न खेलमा एस्टन भिल्लाले लिभरपुललाई ४–२ गोलले हराउँदै आगामी च्याम्पियन्स लिगमा स्थान सुरक्षित गरेको हो ।

एस्टन भिल्लाका लागि ओली वाट्किन्सले दुई तथा मर्गन रोजर्स र जोन म्याकगिनले एक–एक गोल गरेका थिए । लिभरपुलका लागि भर्जिल भान डाइकले दुई गोल फर्काएका थिए ।

यो जितसँगै एस्टन भिल्ला ३७ खेलबाट ६२ अंकका साथ चौथो स्थानमा रहँदै आगामी सिजनको च्याम्पियन्स लिग खेल्ने स्थान सुरक्षित गरेको छ ।

५९ अंकसहित लिभरपुल पाँचौँ स्थानमा रहेको छ। लिभरपुल भने च्याम्पियन्स लिग स्थानका लागि अन्तिम संघर्षमा छ ।

एस्टन भिल्लाले अब प्रिमियर लिगको अन्तिम खेल म्यानचेस्टर सिटीसँग खेल्ने छ । लिभरपुलले घरेलु मैदानमा ब्रेन्टफोर्ड विरुद्ध खेल्नेछ ।