काठमाडौं- प्रतिपक्षी दल नेपाल कम्युनिष्ट पार्टी (एमाले) ले पार्टी सदस्यता नवीकरणको म्याद २०८३ जेठ मसान्तसम्म बढाएको छ ।

पार्टीको केन्द्रीय कार्यालयले बिहीबार जारी गरेको पत्रमा भनिएको छ, ‘आमनिर्वाचनको कारण विधानमा व्यवस्था भएको सदस्यता नवीकरण फागुन–चैतमा गर्ने व्यवस्थालाई हाल सदस्यता नवीकरण गर्न २०८३ जेठ मसान्तसम्मलाई तोकिएको छ ।’

पार्टीको दोस्रो विधान महाधिवेशन र एघारौं राष्ट्रिय महाधिवेशन–२०८२ ले पारित गरेको विधानअनुसार सदस्यता नवीकरण गर्नुपर्ने व्यवस्था छ ।

पत्रमा पार्टी सदस्य (धारा–४) र संगठित सदस्य (धारा–५) दुवैको योग्यता र नवीकरण प्रक्रियाबारे स्पष्ट उल्लेख गरिएको छ ।

सदस्यता कार्ड वितरण व्यवस्था

सामान्य पार्टी सदस्य : प्रदेश/जिल्ला कमिटीले आफैंले छपाई गरी कार्ड वितरण गर्नेछन् ।

संगठित सदस्य : पार्टी केन्द्रले डिजिटल कार्ड उपलब्ध गराउनेछ ।

केन्द्रीय कमिटी, सल्लाहकार परिषद् र केन्द्रीय आयोगका सदस्यहरूको नवीकरण केन्द्रीय कार्यालयबाटै हुने महासचिव शंकर पोखरेलले बताएका छन् ।

महासचिव पोखरेलले पत्रमा सबै प्रदेश तथा जिल्ला कमिटीलाई तोकिएको समयभित्र सदस्यता नवीकरण गरी यथाशीघ्र संगठन विभागमा डिजिटल रेकर्ड अध्यावधिक गर्न निर्देशन दिएका छन् ।

पत्रमा भनिएको छ, ‘तोकिएको समयभित्र सदस्यता नवीकरण गरी यथासमयमा नै संगठन विभागमा आफ्नो रेकर्ड डिजिटल्ली अध्यावधिक गर्नुहुन निर्देशित गरिन्छ ।’

एमालेले यो निर्णयबाट आगामी दिनमा संगठन सुदृढीकरण र सदस्यता अभियानलाई थप प्रभावकारी बनाउने अपेक्षा राखेको छ। एमालेलाई भदौको जेन-जी आन्दोलन र फागुन २१ को निर्वाचनबाट इतिहासकै कडा धक्का लागेको छ।