तेहरान- अमेरिकी नौसेनाको नाकाबन्दीबीच इरानले कडा चेतावनी दिँदै आफ्ना अधिकार पूर्ण रूपमा सुरक्षित नभएसम्म हर्मुज स्ट्रेट नछोड्ने बताएको छ ।

इरानका सर्वोच्च नेता मोजताबा खामेनाईका सैन्य सल्लाहकार मोहसिन रेजाईले प्रेस टीभीसँगको अन्तर्वार्तामा यस्तो भनेका हुन् ।

‘यो जलमार्ग इरानका लागि अत्यन्त महत्वपूर्ण रणनीतिक बिन्दु हो । हामी आफ्नो आर्थिक तथा समुद्री हितको रक्षा गर्न यो स्ट्रेटमा नियन्त्रण कायम राख्नेछौं’, उनले भने ।

रेजाईले प्रश्न गरे, ‘यदि इरानको नौसेना कमजोर छ भने अमेरिकी जहाजहरू हर्मुज स्ट्रेट पार गर्न किन डराउँछन् ?’

उनले थप भने, ‘पछिल्ला समझौताहरूबाट सिकेका पाठअनुसार अब नयाँ समझौता अझ सतर्कतापूर्वक र आर्थिक मुद्दालाई प्राथमिकता दिएर गरिनेछ । अब वार्ताका शर्तहरू इरान आफैंले निर्धारण गर्नेछ ।’

युरेनियम एनरिचमेन्ट अधिकारमा सम्झौता हुँदैन

इरानी विदेश मन्त्रालयका प्रवक्ता इस्माइल बकाईले परमाणु कार्यक्रमअन्तर्गत युरेनियम एनरिचमेन्टको अधिकारमा सम्झौता नहुने बताएका छन् । ‘इरानले आफ्नो परमाणु कार्यक्रमअन्तर्गत युरेनियम एनरिचमेन्टको अधिकारमा कुनै सम्झौता गर्दैन’, उनले भने।

तेहरानमा बुधबार आयोजित पत्रकार सम्मेलनमा बकाईले अगाडि भने, ‘यो अधिकार अन्तर्राष्ट्रिय कानुनअन्तर्गत वैध छ । जबसम्म इरान परमाणु अप्रसार सन्धि (एनपीटी) को सदस्य छ, तबसम्म शान्तिपूर्ण एनरिचमेन्टको पूर्ण अधिकार उसलाई छ ।’

उनले पश्चिमी मिडियाको अटकलबाजीलाई खारेज गरिदिए । ‘कुनै पनि समझौता गर्नुअघि व्यापक ढाँचा तयार हुनुपर्छ । यदि एउटा पक्षले आफ्नो वाचा पालना गरेन भने अर्को पक्षले पनि आफ्नो दायित्व घटाउने अधिकार राख्छ’, उनले भने ।

यो घटनाक्रमले हर्मुज स्ट्रेट लाई लिएर अमेरिका र इरानबीच तनाव थप चुलिएको देखाएको छ । विश्व बजारमा तेल तथा ऊर्जा आपूर्तिमा ठूलो प्रभाव पर्न सक्ने आशंका गरिएको छ ।