काठमाडौं– राष्ट्रिय प्रजातन्त्र पार्टी(राप्रपा)को अनुशासन समितिले दुई नेतालाई स्पष्टीकरण सोध्ने निर्णय गरेको छ।

पार्टीकी उपाध्यक्षसमेत रहेकी अनुशासन समिति अध्यक्ष रोशन कार्कीको अध्यक्षतामा बुधबार बसेको अनुशासन समिति बैठकले केन्द्रीय सदस्य नानीमैयाँ आचार्य र राष्ट्रिय प्रजातान्त्रिक महिला संगठनकी सचिव चाहना अधिकारी लाई ७२ घन्टे स्पष्टीकरण सोधेको हो ।

उनीहरूमाथि प्रतिनिधि सभा निर्वाचनको मुखमा पार्टीको समानुपातिक सूचीविरुद्ध लागेको र चुनाव नजिकिएका बेला पार्टी केन्द्रीय कार्यालयमा धर्ना बसेर भ्रम फैल्याएको आरोप लगाइएको छ।

उनीहरूले बागमती प्रदेश सांसद कुमारी मोक्तान, महिला संगठनकी अञ्जु सुवेदीसहित ६ जना नेतामाथि प्रहरी- प्रशासनमा उजुरी दिएको पाइएकोसमेत अनुशासन समितिले जनाएको छ।

समानुपातिक सूचीमा देखिएको परिवारवाद र अवसरवादको विरोध गर्दै आफूहरू अनसन बसेको उनीहरूले बताएका थिए ।

राप्रपाले निर्वाचन आयोगमा बुझाएको सूचीमा पार्टीका वरिष्ठ उपाध्यक्ष बुद्धिमान तामाङकी श्रीमती सरस्वती लामा र खुश्बु ओली लगायतको नाममा असन्तुष्टि जनाउँदै नेताहरूले अनसन बसेका थिए। तर लामा र ओली दुवै समानुपातिक सांसद भइसकेका छन्।