काठमाडौ|-संयुक्त राष्ट्रसंघीय मिसन (युएनआईएसएफ) मा नेपाली सेनाले पहिलो पटक फोर्स कमाण्डरको जिम्मेवारी पाएको छ। संयुक्त राष्ट्रसंघका महासचिव एन्टेनियो गुटरेसले नेपाली सेनाका रथी गणेश कुमार श्रेष्ठलाई उक्त पदमा नियुक्त गरेका हुन्।

यो नियुक्तिसँगै नेपाली सेनाले शान्ति स्थापनाका अन्तर्राष्ट्रिय प्रयासमा अर्को महत्वपूर्ण उपलब्धि हासिल गरेको छ।

यसअघि विभिन्न युएन मिसनमा उल्लेखनीय भूमिका निर्वाह गर्दै आएको नेपाली सेनाले पहिलो पटक युएनआईएसएफए जस्तो संवेदनशील र रणनीतिक मिसनको सैन्य नेतृत्व सम्हाल्न लागेको हो।

अबीएई क्षेत्र सुडान र दक्षिण सुडानबीचको विवादित इलाका मानिन्छ। त्यहाँ शान्ति, सुरक्षा र स्थायित्व कायम राख्न युएनआईएसएफमा तैनाथ छ। फोर्स कमाण्डरको हैसियतमा रथी श्रेष्ठले मिसनअन्तर्गत तैनाथ बहुराष्ट्रिय सेनाको समग्र कमाण्ड सम्हाल्नेछन्।

नेपाली सेनाका अधिकारीहरूका अनुसार रथी श्रेष्ठको लामो सैन्य अनुभव, शान्ति मिसनमा हासिल गरेको नेतृत्व क्षमता र व्यावसायिक दक्षताका कारण उनलाई यो जिम्मेवारी दिइएको हो।

यस नियुक्तिलाई नेपाली सेनाको प्रतिष्ठा र अन्तर्राष्ट्रिय विश्वसनीयतामा थप वृद्धि गर्ने उपलब्धिका रूपमा हेरिएको छ।