काठमाडौं– जापानको मौसमसम्बन्धी निकायले शुक्रबार कुरील टापु क्षेत्रमा ९.९ म्याग्निच्युडको शक्तिशाली भूकम्प जान सक्ने चेतावनीसहितको गलत आकस्मिक पूर्वसूचना जारी गरेपछि खैलाबैला मच्चिएको छ ।

यस्तो सूचना जारी भएको केही समयमै त्यसलाई फिर्ता लिइएको थियो ।

सो क्षेत्रमा गएको ६.९ म्याग्निच्युडको भूकम्पको मापनलाई बढी आकलन गरिएका कारण उक्त त्रुटि भएको एजेन्सीले जनाएको छ ।

फुजी न्युज नेटवर्कका अनुसार स्थानीय समयानुसार दिउँसो १२:४० बजे जारी गरिएको उक्त चेतावनी आठ मिनेटपछि नै खारेज गरिएको थियो । अमेरिकी भूगर्भ सर्वेक्षण (युएसजिएस) ले कुरील टापुमा ६.९ म्याग्निच्युडको भूकम्प रेकर्ड गरेको थियो ।

म्याग्निच्युड बढी आँकलन गरिएका कारण पूर्वसूचना रद्द गर्नुपरेको जापानी सञ्चार माध्यमले जनाएका छन् । यस घटनाप्रतिको क्षमायाचना गर्दै मौसमसम्बन्धी एजेन्सीले म्याग्निच्युड बढी मापन हुनुको कारणबारे अनुसन्धान भइरहेको जानकारी दिएको छ ।

साथै, यस घटनामा कुनै पनि किसिमको साइबर आक्रमणको सम्भावना नरहेको एजेन्सीले स्पष्ट पारेको छ ।