काठमाडौं– बलिउड अभिनेता आमिर खानका भाञ्जा तथा अभिनेता इमरान खान पछिल्लो समय एउटा विवादमा तानिएका छन् ।

भारतमा भएको विरोध प्रदर्शनमा सहभागी भएको विषयलाई लिएर उनलाई अक्टोबर २८ सम्म देश छाड्न निर्देशन दिइएको छ ।

विदेशी नागरिकसम्बन्धी कानुन उल्लङ्घन गरेको आरोपमा भारतको विदेशी क्षेत्रीय दर्ता कार्यालयले उनलाई नोटिस जारी गरेको हो ।

यो विवाद अक्टोबर १० मा सुरु भएको थियो। त्यस दिन इमरान मुम्बईको अगस्त क्रान्ति मैदानमा मुख्य निर्वाचन आयुक्त ज्ञानेश कुमारविरुद्ध आयोजित विरोध प्रदर्शनमा सहभागी भएका थिए । सोही क्रममा प्रहरीले उनलाई नियन्त्रणमा लिएको थियो ।

घटनापछि भारतीय जनता पार्टी (भाजपा)का नेता किरीट सोमैयाले इमरान अमेरिकी नागरिक भएको दाबी गर्दै विदेशी नागरिकसम्बन्धी कानुन उल्लङ्घन गरेको आरोप लगाए । उनले यस विषयमा प्रहरीमा उजुरीसमेत दिएका थिए ।

प्रहरीका अनुसार मुम्बईको गामदेवी प्रहरी कार्यालयमा परेको उजुरी विदेशी क्षेत्रीय दर्ता कार्यालयमा पठाइएको थियो। त्यसपछि इमरानलाई नोटिस जारी गरिएको हो ।

नाम सार्वजनिक नगर्ने सर्तमा एक प्रहरी अधिकारीले नोटिसमा इमरान अमेरिकी नागरिक रहेको उल्लेख गर्दै अध्यागमन तथा विदेशी नागरिकसम्बन्धी कानुनका धारा ७ र २९ उल्लङ्घन गरेको आरोप लगाइएको जानकारी दिएका छन् ।

सोही आरोपका आधारमा उनलाई अक्टोबर २८ भित्र भारत छाड्न निर्देशन दिइएको जनाइएको छ । यद्यपि, उपलब्ध विवरणमा इमरानको यस विषयमा आधिकारिक प्रतिक्रिया उल्लेख छैन ।