मुगु- नेपाली कांग्रेसको संस्थापन इतर समूहले महामन्त्री गुरुराज घिमिरेलाई मुगु प्रवेशमा निषेध गर्ने निर्णय लिएको छ।

बुधबा बसेको उक्त समूहको बैठकले पार्टी सभापति ऐनबहादुर महरलाई हटाएर हरिजंग शाहीलाई कार्यवाहक तोकेकोमा आपत्ति जनाउँदै यस्तो निर्णय गरेको हो।

‘नेपाली कांग्रेसको विधानमा भएको व्यवस्था बमोजिम १४औं जिल्ला अधिवेशनमा निर्वाचित सभापति ऐनबहादुर शाहीज्यू पार्टीका क्रियाकलापमा सक्रिय सहभागी भइरहेको अवस्थामा बिनाजानकारी, विधानविपरीत कथित केन्द्रीय विशेष महाधिवेशन टीके महामन्त्री गुरुराज घिमिरेले कार्यवाहक सभापति तोकेको निर्णयप्रति खेद प्रकट गर्दै निज महामन्त्रीलाई मुगु जिल्लामा प्रवेश निषेध गर्ने निर्णय पारित गरियो,’ निर्णय माइन्युटमा उल्लेख छ।

नेपाली कांग्रेसले यही असोज १६ देखि महाधिवेशन गर्दैछ। उता शेरबहादुर देउवा नेतृत्वको इतर समूहले आगामी मंसिर २१ देखि महाधिवेशन घोषणा गरेको छ।

मंगलबार मात्रै देउवाले गगनहरूको महाधिवेशनमा भाग नलिन नेता कार्यकर्ताहरूलाई अपिल गरेका थिए ।