काठमाडौं- नेपाली कांग्रेसका पूर्वसभापति शेरबहादुर देउवाले अदालतको निर्णयलाई आफूले सम्मान गर्ने बताएका छन् ।

इतर समूहको राष्ट्रिय भेलाको उद्घाटनसमेत गरेका देउवाले आइतबार बन्दसत्रमा करिब तीन मिनेट सम्बोधन गरे। सम्बोधनका क्रममा उनले अदालतकै कारण आफू नेपाल आउन सकेको बताएका हुन् ।

उनले भने, ‘अदालतले मलाई बचाएको छ, जसको कारण म नेपाल आइपुगेको छु ।’ देउवाले पार्टीभित्र जबरजस्ती विशेष महाधिवेशन गरिएको दाबी गर्दै त्यसका कारण धेरै साथीहरू पार्टीको प्रक्रियाबाट बाहिर रहेको बताए ।

‘जबरजस्ती विशेष महाधिवेशन भयो, धेरै साथीहरू बाहिर रहेका छन्,’ उनले भने । अदालतको निर्णय आफूले मान्ने बताउँदै देउवाले अदालतले न्याय दिनेमा आफू पूर्ण विश्वस्त रहेको बताए । 

‘अदालतको निर्णय मान्छु । अदालतले न्याय दिन्छ भन्ने कुरामा म पूर्ण विश्वस्त छु,’ उनले भने ।