युक्रेन– युक्रेनमा बुधबार भएको रूसी हवाई आक्रमणमा कम्तीमा ६ जनाको मृत्यु भएको छ भने २० जना घाइते भएका छन्।

अधिकारीहरूका अनुसार आक्रमण कालो सागरस्थित बन्दरगाह सहर ओडेसा र रूसको सीमासँग जोडिएको उत्तरपूर्वी सहर सुमीका औद्योगिक तथा स्वास्थ्य पूर्वाधारलाई लक्षित गरी गरिएको थियो।

सुमी क्षेत्रका गभर्नर ओलेग ग्रिगोरोभका अनुसार रूसी सेनाले छ वटा निर्देशित हवाई बम प्रहार गरेको थियो। उक्त आक्रमणमा तीन जनाको मृत्यु भएको र १७ जना घाइते भएको पुष्टि गरिएको छ। मृतकमध्ये एक महिला र एक पुरुष रहेका छन् भने अर्का एक जनाको अवस्था गम्भीर रहेको उनले बताएका छन्।

यसैगरी, ओडेसामा पनि रूसी ड्रोन र मिसाइल आक्रमणले बन्दरगाह तथा नागरिक पूर्वाधारमा क्षति पुर्‍याएको अधिकारीहरूले जनाएका छन्। ओडेसा क्षेत्रका गभर्नर ओलेग किपरका अनुसार यस क्षेत्रमा संयुक्त ड्रोन र क्षेप्यास्त्र आक्रमण लगातार पाँचौँ दिनसम्म जारी रहेको छ। उक्त आक्रमणमा तीन जनाको मृत्यु भएको छ भने कम्तीमा तीन जना घाइते भएका छन्।

यसअघि मङ्गलबार संयुक्त राष्ट्र सङ्घले सन् २०२६ को पहिलो छ महिनामा युक्रेनमा नागरिक हताहतीको सङ्ख्या उल्लेखनीय रूपमा बढेको जनाएको थियो।