काठमाडौं – फिफा विश्वकप २०२६ अन्तर्गत समूह ‘एच’ को महत्वपूर्ण खेलमा आज स्पेन र केप भर्डे आमनेसामने हुँदै छन् । खेल नेपाली समयअनुसार राति ९ः४५ बजे अमेरिकाको एटलान्टा रंगशालामा सुरु हुनेछ ।

विश्व उपाधिका प्रमुख दाबेदारमध्ये एक मानिएको स्पेन आफ्नो पहिलो खेलमा जितसहित प्रतियोगिताको बलियो सुरुवात गर्ने लक्ष्यमा छ। स्पेन सन् २०१० को विश्वविजेता टोली हो। तर पछिल्ला संस्करणहरूमा उनीहरू अपेक्षित सफलता हासिल गर्न सकेका छैनन्—२०१४ मा समूह चरणमै बाहिरिएका थिए भने २०१८ र २०२२ मा अन्तिम १६ मा रोकिएका थिए।

पहिलो खेलमा स्पेनका युवा खेलाडी लमिन यामाललाई प्रशिक्षकले सुरुवातमा बेञ्चमा राख्ने निर्णय गरेका छन् । आफ्नो पहिलो विश्वकपका लागि पूर्ण रूपमा फिट भएपनि प्रशिक्षक लुइस दे ला फुएन्टेले उनलाई सुरुवाती ११ मा नखेलाई खेलको परिस्थितिअनुसार बेन्चबाट प्रयोग गर्न सक्ने संकेत दिएका हुन् ।

यामाल लामो समयदेखि चोटका कारण मैदान बाहिर रहेका थिए । अप्रिलयता उनले ग्रोइन र ह्यामस्ट्रिङ समस्याका कारण कुनै पनि खेल खेलेका थिएनन् र हालैका मैत्रीपूर्ण खेलहरू पनि गुमाएका थिए ।

तर प्रशिक्षक दे ला फुएन्टेले उनको फिटनेसबारे सकारात्मक प्रतिक्रिया दिँदै भने, ‘खुसीको कुरा के हो भने लमिन पूर्ण रूपमा फिट छन्। उनी राम्रो प्रशिक्षण गरिरहेका छन् र टोलीका अन्य घाइते खेलाडीहरू पनि ठीक अवस्थामा छन्।’