वाशिङ्टन- इरानसँगको सम्झौतालाई लिएर अमेरिकामै विवाद र विरोध भएको छ।

एकजना अमेरिकी डेमोक्रेट सांसद क्रिस मर्फीले सम्भावित अन्तिम सम्झौता इरानसामु ‘आत्मसमर्पण’ जस्तो देखिन सक्ने बताए ।

उनले लामो युद्धभन्दा कूटनीतिक सहमति राम्रो विकल्प हुने धारणा राखेका छन्। निरन्तर युद्धले अमेरिकाको हितलाई थप क्षति पुर्‍याउने भएकाले वार्तामार्फत् द्वन्द्व अन्त्य हुनु सकारात्मक हुने पनि उनले बताएका छन्।

यसैबीच, सोमबारदेखि सुरु भएको जी–७ शिखर सम्मेलनमा अमेरिका–इरान प्रारम्भिक सम्झौतापछिको अवस्थाबारे पनि छलफल हुने बताइएको छ।

सम्मेलनमा संयुक्त अरब इमिरेट्स, कतार र इजिप्टको समेत सहभागिता रहनेछ।

सहभागी राष्ट्रहरूले सम्झौता कार्यान्वयनको प्रक्रिया तथा त्यसले पश्चिम एसियाको सुरक्षा, ऊर्जा बजार र क्षेत्रीय स्थिरतामा पार्ने प्रभावबारे समीक्षा गर्ने जनाइएको छ।

यसैबीच, इरानको मेहर समाचार एजेन्सीले अमेरिका र इरानबीच तयार गरिएको १४ बुँदे समझदारीपत्रअन्तर्गत अमेरिकाले इरानका रोक्का गरिएका २४ अर्ब डलरमध्ये पहिलो चरणमा १२ अर्ब डलर बराबरको सम्पत्ति फुकुवा गर्न सक्ने दाबी गरेको छ।

उक्त समझदारीपत्रमा हस्ताक्षर भएपछि ६० दिनको थप वार्ता प्रक्रिया अघि बढ्ने र त्यस क्रममा आणविक कार्यक्रम, प्रतिबन्ध तथा अन्य विवादित विषयमा छलफल हुने जनाइएको छ।