काठमाडौं– वरिष्ठ चिकित्सक प्रा. डा.गोविन्द केसीले चिकित्सा शिक्षा आयोगको रिक्त उपाध्यक्ष पदमा योग्य, दक्ष र स्वच्छ छविका व्यक्तिलाई अविलम्ब नियुक्त गर्न सरकारसँग माग गरेका छन् ।

आइतबार एक प्रेस विज्ञप्ति जारी गर्दै डा. केसीले आयोगको उपाध्यक्ष नियुक्तिमा भइरहेको ढिलाइले सरकार विभिन्न स्वार्थ समूहको प्रभावमा परेको अनुभूति गराएको बताएका छन् । उनले राजनीतिक दल, निजी संस्था तथा अन्य स्वार्थ समूहसँग आबद्ध उम्मेदवारलाई स्वीकार गर्न नसकिने स्पष्ट पारेका छन् ।

उपाध्यक्ष नियुक्ति निष्पक्ष रूपमा योग्यता, दक्षता, अनुभव र स्वच्छ छविका आधारमा गर्नुपर्ने उल्लेख गर्दै उनले अन्यथा सत्याग्रहसहितका आन्दोलनका कार्यक्रम अघि बढाउन बाध्य हुने चेतावनी दिएका छन् । 

डा.केसीले आफूहरू लामो समयदेखि शिक्षा र स्वास्थ्य क्षेत्रको सुधार, सुशासन तथा सामाजिक न्यायका लागि संघर्षरत रहेको स्मरण गराउँदै सरकारको ध्यानाकर्षण गराएका छन् ।

विज्ञप्तिमा स्वास्थ्य तथा शिक्षा क्षेत्रका विद्यमान समस्या, चुनौती र समाधानसम्बन्धी सुझाव तथा मागहरू समेटिएको ज्ञापनपत्र प्रधानमन्त्री, सम्बन्धित मन्त्रीहरू र संसदीय समितिमा बुझाइसकिएको उल्लेख गरिएको छ । 

उक्त ज्ञापनपत्रमाथि आवश्यक कारबाही अघि बढाउन पनि उनले सरकारसँग आग्रह गरेका छन् ।

प्रेस विज्ञप्ति

चिकित्सा शिक्षा र स्वास्थ्य सेवाको गुणस्तर र त्यसमा सबै नेपाली नागरिकहरूको समतामूलक पहुँचको सुनिश्चितता गर्न बनेको चिकित्सा शिक्षा आयोगको रिक्त रहेको उपाध्यक्षको पदको नियुक्तिमा ढीलाइले बालेन सरकार विभिन्न स्वार्थ समूहको प्रभावमा परेको प्रस्ट अनुभव हुन्छ।

राजनीतिक र निजी संस्था लगायत अन्य स्वार्थपरक समूहसँग आबद्ध उम्मेदवारहरू (स्वार्थ बाझिने) हामीलाई स्वीकार्य हुने छैन। तसर्थ सो पदमा निष्पक्ष रूपमा योग्यता, दक्षता, अनुभव र स्वच्छ छविका आधारमा मात्र छनोट भएका व्यक्तिलाई अविलम्ब नियुक्त गर्न सरकारको पुन: गम्भीर ध्यानाकर्षण गराउँदछु। अन्यथा सत्याग्रह सहितका आन्दोलन गर्न बाध्य हुने कुरा पुन: जानकारी गराइन्छ।

हामी लामो समयदेखि शिक्षा र स्वास्थ्य क्षेत्रमा सुधारलगायत सुशासन र सामाजिक न्यायको लागि पनि संघर्षरत रहेको तथ्य सरकारलाई पुन: अवगत गराउन चाहन्छौँ।

नेपालका स्वास्थ्य र शिक्षा क्षेत्रका वस्तुस्थिति, चुनौती र समाधानका लागि सल्लाह, सुझाव र मागहरू समेत समेटेर प्रधानमन्त्री, सम्बन्धित मन्त्रीहरू र संसदीय समितिमा बुझाइएको ज्ञापनपत्र उपर आवश्यक कारबाही अगाडि बढाउन सरकारलाई अनुरोध गरिन्छ।

प्रा.डा.गोविन्द केसी,
काठमाडौं,
२०८३ जेठ ३१।