काठमाडौं – विदेश अध्ययनका नाममा विद्यार्थी ठगिएको गुनासो बढ्न थालेपछि काठमाडौं उपत्यका अपराध अनुसन्धान कार्यालयले उपत्यकाभित्र सञ्चालनमा रहेका शैक्षिक परामर्श संस्थामाथि छापा मारेको छ ।

कार्यालयले शुक्रबार काठमाडौँ उपत्यकाका विभिन्न स्थानमा रहेका ९५ वटा कन्सल्टेन्सीमा एकसाथ अनुगमन तथा छापा मार्दा ६९ जनालाई नियन्त्रणमा लिएको हो ।

प्रहरीका अनुसार ती संस्थामध्ये धेरैले आवश्यक कानुनी प्रक्रिया पूरा नगरी सेवा सञ्चालन गरेको, विदेश पठाइदिने भन्दै रकम असुलेको तथा कागजातसम्बन्धी अनियमितता गरेको आशंकामा अनुसन्धान थालिएको हो ।

कार्यालयका सूचना अधिकारी तथा प्रहरी उपरीक्षक रामेश्वर कार्कीले पक्राउ परेकामाथि प्रारम्भिक ‘स्क्रिनिङ’ गरी कसुरको प्रकृतिअनुसार थप अनुसन्धान अगाडि बढाइने बताए ।

अनुसन्धान टोलीले केही कन्सल्टेन्सीबाट विद्यार्थीको आर्थिक कारोबार, भिसा प्रक्रिया र शैक्षिक कागजातसँग सम्बन्धित विवरणसमेत संकलन गरेको जनाएको छ । प्रहरीले वैधानिक अनुमति बिना सञ्चालन भएका तथा शैक्षिक परामर्शको नाममा ठगीमा संलग्न संस्थामाथि थप कारबाही जारी रहने चेतावनी दिएको छ ।