काठमाडौं- प्रधानमन्त्री वालेन्द्र शाहका पछिल्ला गतिविधि नेकपाकालमा शक्तिशाली प्रधानमन्त्री बनेका केपी शर्मा ओलीसँग मिल्दाजुल्दा देखिन थालेका छन्।

नेकपाको पालामा दुईतिहाइको शक्तिशाली सरकार हुँदा केपीले राज्यका महत्वपूर्ण निकायलाई आफूमातहत राखेर शक्ति केन्द्रिकरण गरेका थिए ।

अहिले बालेन पनि ओलीकै त्यही कुराको सिको गर्दै शक्ति थुपार्न जुटेका छन् । उनले पछिल्लो पटक एकमात्रै गुप्तचर संस्था राष्ट्रिय अनुसन्धान विभागलाई गृहमन्त्रालयबाट तानेर प्रधानमन्त्री कार्यालयमै ल्याएका छन् ।

शाहले अन्तरिम सरकारका पालामा गृह मन्त्रालय मातहतको उक्त विभागलाई प्रधानमन्त्री तथा मन्त्रिपरिषद् कार्यालय मातहत नै तानेका हुन् ।

बुधबार पारित कार्यसम्पादन नियमावली २०८३ अनुसार विभागलाई प्रधानमन्त्री कार्यालयमातहत राखिएको छ।

गृहमा फर्काइएको गुप्तचर संस्था प्रधानमन्त्री कार्यालय मातहत नै राख्नुपर्ने लबिइङबीच बालेनले यो कदम चालेका हुन् ।

प्रधानमन्त्री शाहले ओलीकै शैलीमा प्रधानमन्त्री कार्यालयमा शक्ति थुपार्ने योजनावद्ध तयार नै गरेका छन् । २०७४ को निर्वाचनबाट नेकपा एमाले र नेकपा माओवादीको गठबन्धनले दुईतिहाइ ल्याएपछि तत्कालीन प्रम ओलीले गृह मातहतको विभागलाई प्रधानमन्त्री कार्यालयमा लगेका थिए ।

त्यसबेला नेकपाको शक्तिशाली सरकार हुँदा ओलीले राष्ट्रिय अनुसन्धान विभाग, सम्पत्ति शुद्धीकरण विभाग र राजस्व अनुसन्धान विभागलाई प्रधानमन्त्री कार्यालय अन्तर्गत ल्याएका थिए । त्यसबेला ओलीको यो कदमलाई शक्तिको भोकका रुपमा ब्याख्या गरिएको थियो ।

तर अहिले बालेनको उक्त कदमबारे कसैले मुख खोलेका छन् । बालेनले यी तीन निकायमध्ये राजस्व अनुसन्धान विभागलाई खारेज नै गरिदिएका छन्।

सुशीला कार्की नेतृत्वको अन्तरिम सरकारले राष्ट्रिय अनुसन्धानसहितलाई सम्बन्धित मन्त्रालय (अर्थ र गृह) मा फर्काएको थियो ।

तर बालेनले फेरि कार्यविभाजन हेरफेरका नाममा गृह मन्त्रालय मातहतको जासुसी निकायलाई आफू मातहत नै राखेका हुन् ।