काठमाडौं– प्रधानमन्त्री बालेन्द्र शाहले राष्ट्रिय अनुसन्धान विभागलाई प्रधानमन्त्री कार्यालय मातहतमा ल्याएका छन् ।

तत्कालीन प्रधानमन्त्री केपी शर्मा ओलीले प्रधानमन्त्री कार्यालयमा ल्याउँदा विवादास्पद चर्चा गरिएको राष्ट्रिय अनुसन्धान विभाग प्रधानमन्त्री शाहले फेरि आफ्नै कार्यालय मातहतमा ल्याएका हुन् ।

नेपाल सरकार (कार्य विभाजन) नियमावली, २०८३ मार्फत १८ वटा मन्त्रालयको कार्यविभाजन गर्दै राष्ट्रिय अनुसन्धान विभाग पुनः प्रधानमन्त्री कार्यालयको मातहत ल्याइएको हो ।

०७६ सालमा तत्कालीन प्रधानमन्त्री केपी शर्मा ओलीले राष्ट्रिय अनुसन्धान विभाग, राजस्व अनुसन्धान विभाग र सम्पत्ति शुद्धीकरण विभागलाई प्रधानमन्त्री कार्यालय मातहतमा ल्याएका थिए । ओली सरकारको सो निर्णयले शक्तिको केन्द्रीकरण गर्न खोजिएको भन्दै प्रश्न उठेको थियो ।

यस अघिको शुशीला कार्की नेतृत्वको सरकारले राष्ट्रिय अनुसन्धान विभागलाई गृह मन्त्रालय, राजस्व अनुसन्धान विभाग र सम्पत्ति शुद्धीकरण विभागलाई अर्थ मन्त्रालयको मातहतमा ल्याउने निर्णय गरेको थियो । जसमध्ये राजस्व अनुसन्धान विभागलाई भने सरकारले खारेज गर्ने प्रक्रिया अघि बढाइसकेको छ ।